Иако Баерн Минхен претрпе пораз во првиот полуфинален натпревар, Винсент Компани воопшто не звучи како тренер чиј тим е пред елиминација. По спектакуларните 5-4 на „Паркот на принцовите“, белгискиот стратег порача дека вербата во пласман во финалето е на максимално ниво, потенцирајќи дека неговиот тим покажал карактер каков што ретко се гледа на ова ниво.
„Ако примиш пет гола, обично е готово, но ние дадовме четири“
Компани призна дека имал претчувство оти натпреварот може да се развие во ваква насока со оглед на напаѓачката филозофија на двете екипи. Тој истакна дека иако контролата врз мечот често се губела, резултатот остава сè отворено за реваншот.
„Нормално, ако примите пет гола на гости во полуфинале, приказната е завршена. Но, ние постигнавме четири и можевме да дадеме уште неколку. Тоа покажува дека имаме моќ да го загрозиме ПСЖ во секој момент. Вербата е 100 проценти присутна“, изјави Компани.
Тренерот на Баварците призна дека тимот не се бранел доволно добро во второто полувреме, особено при контранападите на ПСЖ, но потенцираше дека постигнувањето на четири гола во Париз е јасен доказ за квалитетот на неговиот напад.
Незадоволство од судењето и „погледот од трибините“
Компани го проследи овој натпревар од трибините поради суспензија, позиција која воопшто не му се допадна. Во краткиот разговор со Луис Енрике по мечот, тој се пошегува дека не разбира како шпанскиот тренер некогаш можел да ужива гледајќи натпревари од таа перспектива.
😁👆🏼 Luis Enrique to Vincent Kompany: “You saw the game from the stands! Did you like it?”.
— Fabrizio Romano (@FabrizioRomano) April 28, 2026
“No!”. 😂@CBSSportsGolazo 🎥🔝 pic.twitter.com/1GiPLC5E4V
Сепак, Белгиецот беше многу посериозен кога стануваше збор за пеналот досуден за ПСЖ пред самиот крај на првиот дел.
„Пеналот за играње со рака е крајно дискутабилен. Од она што го видов, топката прво го удира играчот во телото, а потоа во раката. Тоа во никој случај не беше чиста ситуација“, незадоволен беше Компани.
Апел до навивачите: „Алијанц Арена“ мора да биде тврдина
За реваншот кој се игра во Минхен на 6 мај, Компани има само едно барање – максимална поддршка од 75.000 навивачи. Тој упати и необичен, но директен апел до сите оние кои имаат влезници.
„Моето единствено барање е: ако некој купил билет, а не се чувствува добро на денот на натпреварот, нека остане дома и нека го даде билетот на најспремните луѓе кои можат да придонесат за оваа тврдина. Потребна ни е истата страст како против Мадрид за да победиме“, порача Компани.
Капитенот Џошуа Кимих ја поддржа оваа самодоверба, забележувајќи дека во финишот на првиот меч фудбалерите на ПСЖ изгледале преморени и почнале да крадат време, што според него е знак дека Баерн е физички поподготвен за одлучувачките 90 минути во Минхен.
