Литванскиот гигант Жалгирис се врати на победничките патеки на најсуров можен начин, совладувајќи го Партизан со неверојатни 109-68. Ова не беше само обична победа, туку историска вечер во „Жалгирио Арена“, каде беа срушени два големи клупски рекорди во Евролигата – за најмногу постигнати поени и највисока разлика во победа.
Мозес Рајт и Силвен Франциско си поигруваа со „црно-белите“
Од самиот старт беше јасно дека Партизан (6-11) нема да го издржи налетот на домаќините. Мозес Рајт максимално ја искористи отсутноста на повредениот Тајрик Џонс и доминираше во рекетот со 17 поени и 6 скокови. Најефикасен повторно беше Силвен Франциско, кој застана на 22 поени, додека Игнас Браздеикис додаде 15.
Жалгирис имаше беспрекорна вечер во нападот со неверојатни 73.9% за два поени и 26 асистенции, оставајќи го противникот без никаква шанса за одбрана.
Криза во Белград: Најмногу примени поени во историјата
За Партизан, оваа недела беше вистински кошмар. По поразот од Виртус дома, овој дебакл во Литванија отвора нови прашања за иднината на тимот по заминувањето на Жељко Обрадовиќ. Ова се воедно и најмногу примени поени за Партизан во еден натпревар од Евролигата и нивниот втор најтежок пораз во историјата на ова натпреварување.
„Мораме да си одиме дома и да седнеме сите заедно, не само играчите, туку и луѓето кои го водат клубот. Мораме да анализираме што понатаму, бидејќи ова беше неприфатливо“, изјави видно разочараниот тренер на гостите, Мирко Оцокољиќ.
Додека Жалгирис (10-7) со голем моментум се подготвува за дуелот со Панатинаикос, во Белград се палат сите аларми по уште една „млака“ партија на нивните миленици.
