Денешниот натпревар помеѓу Чарлтон и Челси во рамките на ФА купот носи многу возбуда поради дебито на Лијам Росениор на клупата на „сините“. Сепак, историјата на овие два клуба крие една од најневеројатните анегдоти што некогаш се случиле на фудбалските терени – приказната за Сем Бартрам и „невидливиот“ натпревар.
Датумот е 25 декември 1937 година. Местото е „Стамфорд Бриџ“. Челси го пречекува Чарлтон, но Лондон е прекриен со толку густа магла што гледачите едвај ги гледаат сопствените раце, а камоли фудбалерите.
15 минути во целосна самотија
Натпреварот започнал, но маглата станувала сè погуста. Во 60-та минута, судијата проценил дека условите се невозможни и одлучил да го прекине мечот. Играчите на двата тима и официјалните лица полека го напуштиле теренот и заминале во соблекувалните.
Сепак, голманот на Чарлтон, Сем Бартрам, не забележал апсолутно ништо. Поради густата магла, тој стоел на својата гол-линија, фокусиран и подготвен да интервенира, мислејќи дека неговиот тим врши силен притисок на другата страна од теренот.
„Помина долго време, а јас се прашував зошто нашите момци толку долго ги напаѓаат домаќините и не дозволуваат топката да дојде до мене“, напиша подоцна Бартрам во својата автобиографија.
„Што правиш уште тука?!“
По цели 15 минути стоење во тишина, низ маглата се појавила силуета. Тоа не бил напаѓач на Челси, туку локален полицаец кој вршел проверка на стадионот пред да се заклучат портите.
„Што правиш уште тука? Натпреварот е прекинат пред 15 минути, стадионот е празен!“, му викнал полицаецот на зачудениот Бартрам.
Кога Сем конечно влегол во соблекувалната, неговите соиграчи веќе биле истуширани и облечени, смеејќи се на негова сметка. Бартрам остана легенда на Чарлтон со дури 622 настапи, но неговата „соло партија“ во маглата засекогаш ќе остане запишана како најчудниот момент во историјата на овој дуел.
Денеска, 89 години подоцна, маглата на „Вали“ (стадионот на Чарлтон) тешко дека ќе го сопре натпреварот, но духот на Сем Бартрам дефинитивно ќе лебди над теренот.
