Англискиот гигант Ливерпул го комплетираше трансферот на шпанскиот репрезентативец Виктор Муњоз од Осасуна за сума од 34,5 милиони фунти. Овој потег одекна како бомба на Островот, бидејќи „Црвените“ успеаја да го договорат 22-годишното крило во последните 24 часа, пред самиот нос на нивниот премиерлигашки ривал.
Муњоз, кој во моментов се наоѓа во САД каде настапува за репрезентацијата на Шпанија на Светското првенство, веќе ги поминал медицинските прегледи во базата во Тенеси и ќе потпише шестгодишен договор со клубот од „Енфилд“.
Нов шок за Њукасл, сценариото од лани се повторува
Раководството на Њукасл веруваше дека зделката е веќе завршена. „Страчките“ имаа прифатена понуда од 33,3 милиони фунти (29 милиони плус 4,3 милиони во бонуси), ги договорија личните услови со играчот, па дури и ги започнаа подготовките за неговите медицински прегледи.
Сепак, претставниците на играчот побараа Њукасл да почека 24 часа, период во кој Ливерпул ја активираше откупната клаузула. За Њукасл ова е болно потсетување на минатото лето, кога на сличен начин ги загубија битките за Александер Исак и Уго Екитике.
Прво засилување за Ираола. Брутална статистика во Ла Лига
Ова е прв официјален трансфер во ерата на новиот главен тренер на Ливерпул, Андони Ираола, кој одлично го познава Муњоз од шпанската Ла Лига. Виктор Муњоз е продукт на славната „Ла Масија“ на Барселона, играше за младинците на Реал Мадрид (дебитираше за првиот тим под водство на Карло Анчелоти во 2025 година), пред да блесне во дресот на Осасуна.
Иако бројката од 6 голови и 2 асистенции минатата сезона не звучи спектакуларно, напредната статистика открива зошто Ираола инсистираше на неговиот потпис.
Според податоците, Муњоз има комплетирано 75 дриблинзи (четврти во цела Ла Лига, веднаш зад Мбапе) и остварено 318 прогресивни носења на топката (топ 9 во лигата). Тој е брз, директен играч кој лесно го крши противничкиот пресинг, што совршено се вклопува во интензивниот стил на Ливерпул.
Што значи ова за Киеза и Диоманде?
Доаѓањето на поливалентниот Муњоз, кој може да игра на двете крилни позиции, сериозно го комплицира статусот на Федерико Киеза. Италијанецот имаше само еден старт во Премиер лигата минатата сезона и, иако се надеваше на нов почеток под водство на Ираола, се чини дека тешко ќе избори место во првиот тим.
Од друга страна, трансферот на Шпанецот не става крај на амбициите на Ливерпул да го донесе крилниот напаѓач на РБ Лајпциг, Јан Диоманде. Репрезентативецот на Брегот на Слоновата Коска останува врвна цел, но германскиот клуб за неговите услуги бара повеќе од 86 милиони фунти.
