Сандерленд продолжува со одличниот старт во Премиер лигата, откако вечерва одигра нерешено со 1-1 против Евертон на „Стадионот на светлината“. Капитенот Гранит Џака го постигна првиот гол веднаш по почетокот на второто полувреме, израмнувајќи го резултатот по спектакуларниот погодок на Илиман Ендаје во првиот дел. Овој бод ја потврди доминацијата на Сандерленд на домашен терен и го донесе тимот во топ 4 на табелата.
Евертон поведе во 15-та минута со неверојатен индивидуален гол на Ендаје. По освојување на топката на самиот раб од теренот, напаѓачот помина низ четворица дефанзивци на домаќините и со прецизен удар ја смести топката во горниот десен агол на голот, потврдувајќи ја својата фантастична форма. Гостите имаа уште неколку шанси пред паузата, вклучително и удар на Џек Грилиш кој погоди во стативата, како и промашена супер-шанса на Тиерно Бери.
Сандерленд беше блед во првиот дел, но втората половина донесе целосна промена. Само 44 секунди по почетокот на второто полувреме, Џака израмни со силен удар кој се одби од Џејмс Тарковски, го измами Џордан Пикфорд и донесе радост кај домашните фанови. Домаќините продолжија да доминираат и создадоа неколку шанси, но Пикфорд и одличната одбрана на Евертон, предводена од Мајкл Кин, спречија гол за победа. Кин имаше неверојатен натпревар: 14 чисти интервенции, три блокирани удари и пет освоени воздушни дуели, потврдувајќи ја својата клучна улога во одбраната на гостите.
Во завршницата, имаше контроверзна ситуација кога топката го погоди Кин во пенал зоната, но судијата и ВАР одлучија дека не се работи за пенал. И покрај тоа, Сандерленд продолжи да ја контролира играта, но без да успее да стигне до победата.
Тренерот на Евертон Дејвид Моjс по мечот изјави: „Во првите 20-30 минути мислев дека ќе бидам разочаран ако одиме дома само со бод, на крајот сум задоволен што го освоивме. Имавме шанса да го направиме 2-0, но потоа Сандерленд доби самодоверба. Сакав многу повеќе, и мислам дека имаме добар тим, но треба да го покажуваме тоа подолго време во мечот“.
Овој бод ги носи „Црните мачки“ во топ 4 на Премиер лигата, на исто бодови со Ливерпул, пред Тотенхем и Челси, и ја продолжува непоразеноста на домашен терен во првиот дел од сезоната. Евертон, од друга страна, останува на 14-то место, пет бода пред зоната на испаѓање, со јасна потреба за ефективност во нападот.
Следен предизвик за Сандерленд е дуелот против лидерот Арсенал овој викенд, каде „Црните мачки“ ќе се обидат да го продолжат феноменалниот старт на сезоната, кој веќе не спаѓа во „почетничка среќа“, туку во сериозна закана за „староседелците“ во лигата.
