Дојде денот кој македонската спортска јавност со нетрпение го очекуваше! Најдобрата македонска тенисерка, Лина Ѓорческа, денес го игра својот историски натпревар од првото коло во главната ждрепка на најпрестижниот тениски турнир во светот – Вимблдон.
Натпреварот е закажан со почеток точно на пладне, од 12:00 часот по македонско време, а огромна вест за сите љубители на спортот е дека овој голем настан ќе можат да го проследат во живо на каналите на Арена Спорт Македонија.
Анисимова претпазлива: „Знам дека игра одлично“
Противничка на нашата Лина на стартот од турнирот ќе биде познатата американска тенисерка Аманда Анисимова. Иако Анисимова зад себе има огромно искуство на највисоко ниво, таа на официјалната прес-конференција пред мечот призна дека е исклучително претпазлива и дека со голем респект влегува во дуелот со македонската претставничка.
„Не знам многу за неа, но секако со мојот тренер ќе дискутираме за нејзината игра, може и ќе погледнеме некои нејзини претходни игри за да не влегувам во мечот тотално неподготвена. Таа се квалификуваше, така што сигурна сум дека игра одлично,“ изјави Анисимова за Лина Ѓорческа.
Американката има и зошто да биде внимателна. Лина веќе врза три брилијантни победи во квалификациите, што значи дека е целосно адаптирана на лондонската трева, се наоѓа во одличен натпреварувачки ритам и поседува огромна самодоверба.
Сите пред ТВ екраните!
Ова е историски момент за македонскиот тенис и македонскиот спорт воопшто. Настапот во главната ждрепка на еден Гранд Слем турнир, и тоа токму на „светите“ терени на Вимблдон, е круна на досегашната кариера на Ѓорческа.
Затоа, денес од 12:00 часот, сите македонски фанови ги повикуваме да застанат пред своите ТВ екрани, да се вклучат на Арена Спорт Македонија и да ѝ дадат силна поддршка на нашата тенисерка на патот кон ново големо изненадување. Напред Лина!
