Асоцијацијата на професионални фудбалери во Англија (ПФА) ги објави идеалните состави за изминатата сезона 2025/26, избрани преку гласовите на самите фудбалери. Шампионот Арсенал доминира во најдобриот тим во Премиер лигата со дури пет претставници, додека капитенот на Манчестер Јунајтед, Бруно Фернандеш, ја понесе главната индивидуална награда за фудбалер на годината.
Арсенал со непробоен бедем, Манчестер Сити доминира во нападот
Очекувано, новиот првак на Англија, Арсенал, има најголем број фудбалери во идеалните единаесетмина, особено во дефанзивната линија. Место во тимот на годината обезбедија голманот Давид Раја, дефанзивците Габриел, Вилијам Салиба и Јуриен Тимбер, како и играчот од средниот ред Деклан Рајс.
Второпласираниот Манчестер Сити е застапен со четворица фудбалери. Во одбраната се најде младиот Нико О’Рајли, во средината Рајан Шерки, додека во навалната линија местата им припаднаа на Ерлинг Халанд и Антоан Семењо, кој пристигна на „Етихад“ во јануарскиот преоден рок.
Најпријатното изненадување во нападот е бразилскиот голгетер на Брентфорд, Игор Тијаго, кој сосема заслужено се најде меѓу елитата по импресивната сезона во која постигна 22 премиерлигашки погодоци.
Join the PFA Premier League Team of the Year on stage at the PFA Awards. 😍 pic.twitter.com/PD2GmhdCTg
— PFA (@PFA) August 26, 2026
Историско признание за Бруно Фернандеш
Наградата за најдобар фудбалер во Премиер лигата (PFA Players’ Player of the Year) отиде во рацете на Бруно Фернандеш, кој е и единствениот претставник на Манчестер Јунајтед во тимот на годината. Португалецот имаше извонредна индивидуална сезона во која постави нов рекорд со 21 асистенција во првенството.
Фернандеш е првиот фудбалер на Манчестер Јунајтед што ја освојува оваа престижна награда по Вејн Руни во сезоната 2009/10. Исто така, ова е првпат по пауза од девет години признанието да не заврши кај играч на Манчестер Сити или Ливерпул – низа која траеше уште од 2017 година кога славеше Н’Голо Канте со Челси.
Кај дамите, фудбалерка на годината во Женската Суперлига (WSL) е репрезентативката на Јамајка од редовите на шампионот Манчестер Сити, Кадиџа „Бани“ Шо, која ја предводеше својата екипа до титулата со 21 постигнат гол.
Идеален тим на Премиер лигата за сезоната 2025/26 (PFA):
- Голман: Давид Раја (Арсенал)
- Одбрана: Јуриен Тимбер (Арсенал), Вилијам Салиба (Арсенал), Габриел (Арсенал), Нико О’Рајли (Манчестер Сити)
- Среден ред: Деклан Рајс (Арсенал), Бруно Фернандеш (Манчестер Јунајтед), Рајан Шерки (Манчестер Сити)
- Напад: Ерлинг Халанд (Манчестер Сити), Антоан Семењо (Манчестер Сити), Игор Тијаго (Брентфорд)
