Светот на Формула 1 денес доби нова суперѕвезда. Младиот Италијанец Кими Антонели приреди сензација на квалификациите за Големата награда на Кина, освојувајќи ја својата прва пол-позиција во кариерата. Со ова, тој го собори рекордот и стана најмладиот возач во историјата кој ќе тргне од првата позиција на една Гран-при трка.
Антонели го „скрши“ рекордот, драма во гаражата на Расел
Иако Џорџ Расел доминираше во досегашниот дел од сезоната, денешниот ден му припадна на неговиот 19-годишен тимски колега. Антонели постави недостижно време од 1m 32.064s, победувајќи го Расел за две десетинки.
Квалификациите за Мерцедес за малку ќе се претвореа во катастрофа. На почетокот на одлучувачката Q3 сесија, болидот на Расел застана на патеката поради проблем со менувачот (остана заглавен во прва брзина). Механичарите успеаја со „брзинска операција“ да го вратат на патеката во последната минута, а Расел со неверојатен круг во последната секунда успеа да се пробие до второто место, обезбедувајќи целосен „Мерцедес“ прв ред.
Ферари и Мекларен во заседа, Ред Бул продолжува да тоне
Вториот ред е резервиран за возачите на Ферари. Луис Хамилтон го победи Шарл Леклер за само 13 илјадити делови од секундата и ќе стартува како трет. Веднаш зад нив се возачите на Мекларен, Оскар Пјастри и Ландо Норис, кои не успеаја да го загрозат приматот на водечките два тима.
Најголемото разочарување повторно е Ред Бул. Актуелниот светски шампион Макс Верстапен квалификациите ги заврши на поразителното 8-мо место, со речиси една секунда заостанување зад Антонели. Неговиот тимски колега Исак Хаџар ќе стартува деветти.
Резултати од квалификациите (Топ 10):
- Кими Антонели (Мерцедес) – 1:32.064
- Џорџ Расел (Мерцедес) +0.222
- Луис Хамилтон (Ферари) +0.351
- Шарл Леклер (Ферари) +0.364
- Оскар Пјастри (Мекларен) +0.486
- Ландо Норис (Мекларен) +0.544
- Пјер Гасли (Алпин) +0.809
- Макс Верстапен (Ред Бул) +0.938
- Исак Хаџар (Ред Бул) +1.057
- Оли Берман (Хас) +1.228
Разочарување за Астон Мартин и Кадилак
Додека дебитантите како Антонели и Берман слават, ветераните потфрлија. Фернандо Алонсо (Астон Мартин) испадна уште во првата сесија (Q1) и ќе стартува како 19-ти, додека Серхио Перез со својот Кадилак го допре дното, квалификувајќи се на последното, 22-ро место.
