Возбудата за НБА Ол-Стар викендот 2026 расте, а фановите го кажаа своето во вториот пресек од гласањето. Лука Дончиќ, сега како ѕвезда на Лос Анџелес Лејкерс, останува на самиот врв со најмногу освоени гласови во целата лига, додека Јанис Антетокумпо ја предводи Источната конференција.
Гласањето, кое носи 50% од одлуката за стартерите, влегува во финишот, а борбата за позициите е жестока.
Дончиќ недопирлив на Запад, „Вемби“ во топ 5
Словенечкиот волшебник Дончиќ собра импресивни 2,229,811 гласови, зацврстувајќи го своето место како најпопуларен кошаркар на планетата во моментов.
Зад него во Западната конференција, редоследот во топ 5 останува непроменет:
- Лука Дончиќ (ЛА Лејкерс) – 2,229,811
- Никола Јокиќ (Денвер) – 1,998,560
- Стеф Кари (Голден Стејт) – 1,844,903
- Шеј Гилџус-Александер (Оклахома) – 1,554,468
- Виктор Вембањама (Сан Антонио) – 1,321,985
Ентони Едвардс од Минесота демне од шестата позиција.
Јанис и Брансон го држат Истокот
На другиот брег, „Грик Фрик“ е неприкосновен со 2,092,284 гласови. Голема промена има на втората позиција, каде Џејлен Брансон (Њујорк Никс) успеа да се искачи со 1,916,497 гласови, прескокнувајќи го Тајрис Макси од Филаделфија. Топ 5 на Исток го комплетираат Кејд Канингем и Донован Мичел.
Luka Dončić and Giannis Antetokounmpo remain the leaders in their conferences in the second fan returns in NBA All-Star Voting 2026.
— NBA Communications (@NBAPR) January 6, 2026
Fans (50% of the vote) join NBA players (25%) and a media panel (25%) in selecting five players in each conference honored as starters. pic.twitter.com/u8tlbj9GA8
Фановите на социјалните мрежи веќе водат кампањи за своите фаворити, па така може да се забележат повици за гласање за Дени Авдија, но и остри критики за тоа што Џоел Ембид воопшто добива гласови.
Нов формат: САД против Светот
Ол-Стар натпреварот оваа година ќе се одржи на 15 февруари во новата „Intuit Dome“ арена во Инглвуд, домот на Клиперси. НБА воведе револуционерен формат, турнир со три екипи: Два тима од САД и еден Тим Свет (интернационалци).
Гласањето завршува на 14 јануари, а стартерите ќе бидат објавени на 19 јануари.
