Менаџерот на Њукасл, Еди Хау, призна дека иднината на најголемата ѕвезда на тимот, Александер Исак, можеби е надвор од негова контрола, во услови на силен и интензивен интерес од Ливерпул. Оваа изјава доаѓа само неколку дена откако Швеѓанецот го информираше клубот дека сака да ги разгледа своите опции и беше изоставен од пред-сезонската турнеја.
Иако од клубот инсистираат дека немаат добиено формална понуда, изјавата на Хау е јасен сигнал дека Њукасл се наоѓа во исклучително тешка позиција.
“Мојата желба е да остане, но тоа не е целосно под моја контрола”
Зборувајќи пред новинарите во Сеул, Јужна Кореја, Хау даде изјава која ги загрижи навивачите.
“Тој е сè уште наш играч. Има договор со нас. Ние, до одреден степен, контролираме што е следно за него. Би сакал да верувам дека сите можности се сè уште отворени. Мојата желба е тој да остане, но тоа не е целосно под моја контрола“, изјави Хау. “Не сме добиле формална понуда за Алекс од ниту еден клуб. Мојата желба е тој да остане и да го гледаме како игра повторно следната година”.
‘My wish has always been that he stays and we him play again next year, but that’s not in my full control’ 💬
Eddie Howe discusses if Alexander Isak could be leaving Newcastle ⚽️ pic.twitter.com/B8Urbxwy99
— Sky Sports News (@SkySportsNews) July 29, 2025
Зошто Исак е фрустриран?
Според анализата на новинарот на Sky Sports, Кит Дауни, фрустрацијата на Исак има неколку причини.
Прво, тој бил фрустриран што клубот му ја ускратил можноста да преговара кога Ливерпул првично покажал неформален интерес. Второ, фактот што Ливерпул потоа го доведе Иго Екитике (кој се сметаше за потенцијална замена за Исак во Њукасл), за него претставувал уште една “затворена врата”.
“Мислам дека Исак смета дека, откако помина три години во Њукасл, постигна 62 гола и им помогна да го освојат Карабао купот, го постигнал она што можел да го постигне тука. Неговиот развој е побрз од развојот на клубот”, анализира Дауни.
Напаѓачот е амбициозен, сака да освојува поголеми трофеи и смета дека заслужува плата од 250.000 до 300.000 фунти неделно, сума што ја заработуваат другите врвни напаѓачи во лигата, а која Њукасл не може да му ја понуди.
Што е следно?
Њукасл е во силна преговарачка позиција бидејќи Исак има уште три години од својот договор, а клубот бара отштета од неверојатни 150 милиони фунти. Сепак, со незадоволна ѕвезда и менаџер кој признава дека нема целосна контрола, се чини дека прашањето не е дали, туку кога ќе пристигне рекордната понуда од Ливерпул.
