Кога Маркус Рашфорд пристигна на „Камп Ноу“ како позајмен играч од Манчестер Јунајтед минатото лето, многумина беа скептични. Сепак, 28-годишниот напаѓач ги демантираше сите критичари и стана еден од клучните адути во тимот на Ханси Флик. Според последните информации на раномираниот „The Athletic“, каталонскиот гигант веќе започнал планови за негово трајно задржување во Шпанија.
Статистика која импресионира
Рашфорд не е само „звучно име“, туку играч кој испорачува резултати. Иако започна како стартер на само 18 натпревари, тој веќе има 19 гол-контрибуции (8 гола и 11 асистенции) во 29 настапи во сите натпреварувања.
Она што посебно ги радува навивачите е неговиот настап во Европа, каде Рашфорд има 4 погодоци за Барселона во Лигата на шампионите, со што е втор стрелец после Фермин Лопез кој има 5 после синоќешниот настап.
Совршен професионалец и „џокер“ од клупа
За разлика од турбулентниот период на „Олд Трафорд“, во Барселона Рашфорд покажува беспрекорна ментална сила. Тренерот Ханси Флик јавно го пофали неговиот професионализам:
„Тој е апсолутен професионалец. Кога не беше избран за стартер против Ајнтрахт, ми рече: ‘Шефе, најважен е тимот, мора да ги освоиме трите бода. Останатото не е битно’. Тоа е совршен менталитет“, изјави Флик.
Англичанецот се адаптираше на улогата на ротација, нудејќи му на тимот длабочина која му недостигаше минатата сезона. Иако неговата дефанзивна работа не е на нивото на Рафиња, неговата креативност е на врвно ниво – неговите 6 асистенции во Ла Лига се веќе подобар учинок од која било од неговите претходни четири сезони во Премиер лигата.
Финансиската загатка: Позајмица или трансфер?
Главната пречка за Барселона е, како и секогаш, економската состојба. Во договорот за позајмица постои опција за откуп од 30 милиони евра, сума која за многумина изгледа како „кражба“ за играч од негов калибар. Сепак, неговата висока плата е проблем за лимитот на Ла Лига.
Се очекува Барселона да се обиде да ја продолжи позајмицата за уште една сезона или да преговара за намалување на примањата на фудбалерот за да може да го регистрира како траен трансфер.
Животот во Шпанија му годи
Рашфорд изгледа посреќен од кога било. Живее во Кастелдефелс (крајбрежниот град каде некогаш живееше и Меси) и веќе го учи јазикот. Неговата поврзаност со соиграчите, особено со младиот Руни Барџи, му овозможи брза адаптација на медитеранската култура.
Рашфорд веќе не е играчот кој „луташе“ во Манчестер. Тој стана модерен напаѓач кој ужива во слободата што му ја дава Флик и е подготвен да биде дел од новата успешна ера на Барселона.
