На средината од младинскиот Олимписки фестивал кој се одржува за прв пат во Македонија, вчерашниот ден беше исполнет со многу спорт, медали и успеси на младите спортисти.
Таеквондо
Македонската таеквондистка Душица Бреслиева го заврши настапот на ЕМОФ со две убави победи и храбра борба во четвртфиналето. Бреслиева прво ја совлада Норвежанката Матеа Јакобсен со 2-0, а потоа и Украинката Анастасија Хаиворонска со 2-1. Во борбата за полуфинале загуби од Шпанката Карла Сесар (0-2), но нејзиниот учинок останува најдобар досега за Македонија во боречките спортови на фестивалот.
Баскет 3х3
И машката и женската кошаркарска селекција на Македонија загубија од Словенија во баскет 3×3. Девојките беа поразени со 6:16, а момчињата пружија посилен отпор, но загубија со 15:21.
Кајакарење
На Матка, кајакарот Кристијан Смилев го освои осмото место во финалето на К1-слалом, со време од 1:47.64. Првото место го освои Полјакот Марек Кулчучки, пред Австриецот Макс Штрајнбренер и Германецот Јохан Шмит.
Кај девојките, златото отиде кај Чешката Барбора Ондрачкова, а во C1 дисциплината победија Лео Роје (Франција) и Патриција Иваниец (Полска).
Бадмингтон
Велика Британија славеше двојна победа. Каљан Маној и Ишасрија Мекала се новите младински шампиони во машка и женска конкуренција.
Гимнастика
Во мешаниот тимски натпревар, Франција го освои златниот медал, а Италија и Израел ги комплетираа останатите места на подиумот.
View this post on Instagram
Атлетика
Во скок со стап, Закарија Диа од Франција прескокна 5.20 метри за злато, пред Иван Варга од Унгарија и Виктор Јарошевич од Полска.
Трката на 800 метри за момчиња беше спектакл до последниот метар. Андор Шуман од Германија победи со време од 1:48.82, пред Италијанецот Умед Карачио и Белгиецот Ленерт ван Дајк.
Велосипедизам
На улиците на Куманово, Ана Бонаси од Италија победи со време од 1:03:00, додека кај момчињата, драмата заврши со злато за Австриецот Никлас Висмајр, пред Франција и Велика Британија.
Пливање
Во Олимпискиот базен вчера беа постигнати следниве резултати:
Алесандра Мао (Италија) доминираше на 200 метри слободно со време од 2:00.13.
Остин Андерсон Менли (Велика Британија) беше најбрз на 200 метри грбно.
Борока Жофија Кертес (Унгарија) победи на 100 метри делфин.
На 50 метри слободно злато освои Микита Лјах (БОО).
Во епско фото-финиш финале, Италија победи во 4×100 метри мешана штафета пред Велика Британија за само 0.02 секунди!
Како стои Македонија?
Иако без медал на денешната програма, македонските спортисти покажуваат срце, страст и напредок. Бреслиева, Смилев и нашите 3×3 тимови беа храбри во конкуренција со европските млади надежи.
Следуваат уште неколку денови натпревари, нови медали и нови спортски херои. Погледнете ги најдобрите моменти од вчерашниот спортски ден!
