Новата ера во Формула 1, која започна со големи промени во регулативите за 2026 година, веднаш ги подели мислењата во падокот. Додека некои возачи веќе почнаа со „дрвја и камења“ по новиот формат, челниците на спортот порачуваат: Без паника, дајте му време на производот!
Верстапен и Алонсо со најжестоки критики
Најгласен во незадоволството е четирикратниот шампион Макс Верстапен, кој новите правила ги нарече „анти-тркачки“. Не заостана ниту Фернандо Алонсо, кој иронично изјави дека со овој систем Ф1 се претворила во „светски шампионат во батерии“.
Критиките главно се однесуваат на преголемата зависност од електричната енергија и т.н. „super clipping“ – момент кога болидот нагло губи брзина на правците за да ја наполни батеријата, што според возачите го убива вистинското чувство на тркање.
Доменикали смирува: Мали подесувања ќе има, но не и радикални промени
Претседателот на Ф1, Стефано Доменикали, е јасен дека нема да има „сечење со секира“ на правилата по само две трки.
„Мораме да бидеме трпеливи. Податоците од Австралија не се репрезентативни поради специфичниот изглед на патеката. Ќе ги набљудуваме првите четири трки, вклучувајќи ги Кина и Јапонија, пред да донесеме какви било одлуки за мали корекции во софтверот“, порача Доменикали.
Хамилтон воодушевен, Верстапен во очај
Интересно е што во Кина видовме две сосема различни искуства. Луис Хамилтон изјави дека трката во Шангај била една од најдобрите во неговите 20 сезони, фалејќи ја агилноста на новите, помали болиди.
Од друга страна, Верстапен имаше викенд за заборав без освоен бод, по што порача дека фановите кои уживаат во ова ново тркање „всушност не знаат што е вистинско тркање“. Тото Волф од Мерцедес возврати дека негативноста на Макс веројатно доаѓа од фактот што неговиот болид моментално изгледа како „хорор за возење“.
Што е следно?
По трката во Сузука, Ф1 влегува во петнеделна пауза (поради откажаните трки во Бахреин и Саудиска Арабија), што ќе биде идеален период за детална анализа на податоците. Иако хардверски промени на моторите се невозможни до 2027 година, Ф1 и ФИА размислуваат за суптилни промени во софтверот за да се подобри спектаклот, особено во квалификациите.
Едно е сигурно – Ф1 стои цврсто зад својата визија. Наместо радикални промени, ќе се оди со внимателни чекори за да не се предизвикаат несакани последици кај инженерите и тимовите.
