Извлечени се паровите за осминафиналето на најстарото фудбалско натпреварување во светот, а ФА Купот уште еднаш докажа зошто е омилен кај фановите. Најголемата вест доаѓа од Велс – нисколигашот Рексам ќе ги пречека ѕвездите на Челси во обид да го приреди изненадувањето на векот!
Рексам сонува Холивудско сценарио
За Рексам ова е првпат да стигнат до оваа фаза по далечната 1997 година. Откако го елиминираа Ипсвич во петокот, судбината им додели мега-пресметка со „сините“ од Лондон. Челси, кој го прегази Хал со 4:0 за да стигне тука, влегува како огромен фаворит, но на „Рејскорс Граунд“ се подготвува пеколен пречек.
Веднаш по ждрепката, сопственикот на Рексам и холивудска ѕвезда, Рајан Рејнолдс, ја сподели својата реакција на социјалните мрежи. На видеото кое веќе е вирално, Рејнолдс е снимен како го следи извлекувањето и во моментот кога името на неговиот тим беше споено со Челси, тој остана во шок, држејќи се за глава пред да почне со својот карактеристичен хумор.
„Ова е или почеток на најдобриот филм во историјата на Рексам, или најскапиот час по фудбал што некогаш сме го платиле,“ се пошегува Рејнолдс во својот стил.
Chelsea at the Racecourse! Holy crap 🔴⚔️🔵 pic.twitter.com/aC8EnLCZEl
— Ryan Reynolds (@VancityReynolds) February 16, 2026
Арсенал во Мансфилд, „тешка категорија“ во Њукасл
Лидерот во Премиер лигата, Арсенал, кој чека на овој трофеј од 2020 година, ќе има навидум лесна, но опасна задача на гостувањето кај третолигашот Мансфилд Таун. Мансфилд веќе покажа дека не се плаши од елитата, елиминирајќи го Барнли во претходната рунда.
Најзвучниот дуел меѓу две екипи од Премиер лигата дефинитивно е пресметката на „Сент Џејмс Парк“ каде Њукасл ќе ги одмери силите со актуелниот шампион Манчестер Сити. Ливерпул, пак, ќе патува кај „фенерџијата“ во Премиер лигата, Вулверхемптон.
Натпреварите ќе се играат за време на викендот на 7-ми и 8-ми март.
Сите парови за петтата рунда:
- Фјулам против Саутемптон
- Порт Вејл/Бристол Сити против Сандерленд
- Њукасл против Манчестер Сити
- Лидс против Норич
- Мансфилд против Арсенал
- Вулверхемптон против Ливерпул
- Рексам против Челси
- Вест Хем против Брентфорд
