Светот на тенисот уште е во шок по веста дека Хуан Карлос Фереро и Карлос Алкараз повеќе не се тим. По седум години заедничко патување, во кое младиот Шпанец од талентирано дете стана светски број 1 и освојувач на Грен слем титули, патиштата на „ученикот и учителот“ се разделија. Во емотивно интервју за шпанскиот весник „Марка“, Фереро ја отвори душата и призна дека се чувствува скршено.
Разделба поради договор, а не поради кавга
Иако многумина шпекулираа за евентуални конфликти, Фереро појасни дека причината за крајот е чисто професионална – неусогласеност околу новиот договор за 2026 година.
„Имаше одредени точки во кои не се согласувавме. Неговото опкружување го бараше најдоброто за него, јас го барав најдоброто за мене. На крајот, одлучивме да се разделиме. Немаше кавги, цела година односот ни беше спектакуларен“, вели Фереро.
„Бев заљубен во неговиот тенис“
Популарниот „Комарец“ (El Mosquito) со носталгија се присети на почетоците, кога Карлос имал само 15 години и кога заедно патувале по мали турнири со соништа за врвот.
„Тенисот на Карлос ме имаше ‘заљубено’. Имав среќа да најдам некој што учи со брзина на светлината. Тој е играч со импресивни технички и ментални капацитети. Верувам дека тој може да биде најдобриот во историјата на овој спорт. Иако веќе не сум негов тренер, јас ќе останам негов најголем фан“, додава емотивно Фереро.
Фереро признава дека во моментов е премногу повреден за да размислува за нов ангажман, иако веќе добил понуди од врвни тенисери. Вели дека му е потребно време да го „преболи“ прекинот на оваа длабока врска.
„Сега сум повреден. Овие врски не се прекинуваат лесно од денес за утре. Потребно е време за дуење. Сигурно ќе ме боли кога ќе го гледам како игра на Австралија Опен преку телевизор, но се надевам дека ќе соберам храброст да го гледам и да навивам за него“.
Фереро не ја затвора вратата за евентуална соработка во далечна иднина, но засега, кормилото кај Алкараз го презема Самуел Лопез, додека Фереро останува дома во својата академија во Вилена за да ја залечи раната од најтешкиот „пораз“ во неговата тренерска кариера.
