Здравјето на фудбалерите е приоритет број еден, а Фудбалската федерација на Македонија уште еднаш покажа дека не штеди на знаење. Медицинската и антидопинг комисија на ФФМ учествуваше на престижниот 8-ми семинар за професионален третман на спортисти во Минхен, настан кој ги собира најголемите умови во спортската медицина.
Во друштво на светската елита
Македонската делегација беше една од само 20-те од цела Европа кои добија покана. Ова е огромно признание, особено што годинава семинарот за првпат беше отворен за земји надвор од германското говорно подрачје, што е доказ дека работата на нашите медицински лица е ценета и на меѓународно ниво.
Нашите претставници имаа можност да учат директно од:
- Марк Жилет – главниот медицински човек на англиската Премиер лига
- д-р Даниел Броман – шефот на спортска медицина во City Football Group (групацијата која го менаџира Манчестер Сити).
- Енда Кинг – реномираниот стручњак од познатата болница Аспетар во Катар.
Знаењето директно кај нашите репрезентативци
На семинарот во Минхен, ФФМ ја претставуваа докторите Небојша Настов и Александар Милевски, заедно со физиотерапевтите Бојан Цаневски и Срѓан Димитриевски.
„За нас е од огромно значење да ги следиме најновите трендови во рехабилитацијата и превенцијата. Овие знаења директно ги применуваме во работата со нашите репрезентативци, со цел да обезбедиме највисоки стандарди на грижа“, истакна д-р Небојша Настов.
Темите беа од суштинско значење: од модерни начини за лекување спортски повреди, па сè до најновата нутритивна поддршка за фудбалерите. Со ваква едукација, нашите „рисови“ се во сигурни раце!
