Враќањето на Формула 1 овој викенд ќе се одвива под екстремни временски услови. Поради силниот топлотен бран кој ја зафати Европа, меѓународната автомобилистичка федерација (ФИА) официјално ја прогласи трката за Големата награда на Австрија за „трка со топлотен ризик“.
Според австриската метеоролошка агенција GeoSphere, температурите на патеката „Ред Бул Ринг“ во Шпилберг постојано ќе растат во текот на викендот, а за време на неделната трка од 71 круг се очекува да достигнат 36 Целзиусови степени (со температури на самиот асфалт кои веројатно ќе надминат 50 степени).
Ова е првпат оваа сезона ФИА да ја активира оваа специјална регулатива, која беше воведена по застрашувачката трка во Катар во 2023 година, кога неколку возачи колабираа од дехидрација, а Естебан Окон повраќаше во својот болид.
Како возачите ќе се справуваат со горештините?
Температурите во кокпитот на еден болид од Формула 1 можат да надминат 40 степени. Кога на тоа ќе се додадат неколкуте слоеви огноотпорна долна облека, комбинезонот, подкапата и кацигата, прегревањето на телото е многу сериозна и опасна закана. За разлика од некои други спортови каде се воведуваат паузи за освежување, во Ф1 тоа е невозможно.
Прогласувањето на „топлотен ризик“ им дозволува на возачите да користат специјален систем за ладење. Станува збор за елек кој се носи под комбинезонот, низ кој минува систем од цевки преку кои се пумпа разладена течност (најчесто гликол) за да се намали телесната температура. Овие елеци не смеат да тежат повеќе од 500 грама.
Користењето на овој елек не е задолжително. Некои возачи (како Макс Верстапен и Луис Хамилтон) претходно одбиваа да го носат бидејќи им е неудобен, или поради стравот дека разладната течност може да се стопли пред крајот на трката, со што елекот би имал контраефект. Доколку возачот одлучи да не го користи системот за ладење, ФИА наложува во неговиот кокпит да се додаде баласт (тег) од половина килограм, за да не добие неправедна предност во тежината на болидот.
Надвор од болидот, тимовите веќе користат разни иновации. Најпознати се „вселенските јакни“ на Мерцедес кои се специјално дизајнирани разладни обвивки развиени со Адидас кои ги носат Џорџ Расел и Кими Антонели. Останатите возачи најчесто се потпираат на традиционалните елеци со мраз, ладни пешкири околу вратот и чадори за сенка до самите секунди пред стартот.
Проблем и за машините: Моторите под огромен стрес
Горештините нема да бидат проблем само за луѓето, туку и за самите болиди. Патеката во Шпилберг се наоѓа на 700 метри надморска височина. Поради пореткиот воздух, моторите и онака мораат да работат понапорно за да ја произведат истата моќност. Во комбинација со екстремните температури, тимовите ќе имаат сериозна главоболка како да ги оладат моторите, па се очекува болидите да имаат отворени дополнителни вентилациски отвори на каросеријата.
Ова ќе биде посебен тест за Мерцедес (кои имаа проблеми со доверливоста на моторот на последните трки) и за Ферари, кои токму во Австрија планираат да ја претстават својата нова спецификација на мотор. Деградацијата на гумите исто така ќе биде огромна, па се очекуваат многу различни тактики и чести застанувања во боксот.
Трката за Големата награда на Австрија стартува в недела во 15:00 часот.
