“SEGA” и “Sports Interactive” потпишаа повеќегодишен договор со светската фудбалска федерација ФИФА, со што Светското првенство, Светското првенство за жени и Клупското светско првенство ќе станат дел од претстојната менаџерска симулација “Football Manager 2026”.
Во играта ќе бидат вклучени сите натпреварувања со официјални дресови, визуелен идентитет и ТВ-графика идентична со вистинските турнири. Ова претставува првата соработка помеѓу ФИФА и легендарната игра “Football Manager”.
Лиценцираниот светски пакет ќе пристигне преку големо ажурирање во 2026 година, непосредно пред почетокот на Светското првенство во САД, Мексико и Канада. Сите 48 репрезентации што ќе учествуваат на мундијалот ќе бидат достапни во играта, овозможувајќи им на играчите низ светот да ја преземат контролата над најсилните национални тимови.
Иако играта нема да ги вклучува правата за реални ликови на играчите, кои и понатаму се во сопственост на поранешниот партнер на ФИФА, “EA Sports”, новиот систем ќе понуди целосно редизајниран и “многу побогат” интернационален менаџмент мод, според изјавите на “Sports Interactive”.
“Football Manager 2026” ќе биде официјално објавен на 4 ноември 2025 година и ветува да биде најреалистичната фудбалска менаџерска симулација досега, со најголемата лиценцирана новина во историјата на серијата.
