Групната фаза на Африканскиот куп на нации (АФКОН) во Мароко понуди спектакл, драма и фудбалска магија, а Африканската фудбалска конфедерација (КАФ) официјално ги избра најдобрите 11 кои блеснаа во првиот дел од шампионатот.
Идеалниот тим е совршен спој на докажани ветерани и млади ѕвезди кои го освојуваат светот. Во формација 4-3-3, тимот изгледа застрашувачки.
Искуство на голот и бедем во одбраната
На голот неприкосновен е египетскиот „фараон“ Мохамед Ел Шенави (36), кој со своето искуство и лидерство беше клучниот фактор за Египет во тесните натпревари.
Одбраната ја предводат двајца марокански бекови – Нусаир Мазрауи десно и Јахија Атијат-Алах Ел Абди лево, кои беа незаменливи во двата правци. Централниот бедем го сочинуваат моќниот Едмонд Тапсоба (Буркина Фасо) и Аксел Туанзебе (ДР Конго), кој покажа неверојатна зрелост и смиреност.
Креативност и брзина во нападот
Средината на теренот е резервирана за „мозокот“ на Мароко, Брахим Дијаз, кој со својата визија ги отклучуваше противничките одбрани. До него се неуморниот Карлос Балеба (Камерун) како физичка сила и Адемола Лукман (Нигерија) кој беше постојана закана со своите втрчувања.
Нападот е „атомски“. Капитенот на Алжир, Ријад Марез, ја доби улогата на десно крило благодарение на своето мајсторство за креирање игра. На спротивната страна е младата ѕвезда на Брегот на Слоновата Коска, Амад Диало, додека во врвот на нападот е неуништливиот Садио Мане (Сенегал), кој продолжува да биде лидер и егзекутор.
За најдобар тренер во групната фаза е прогласен селекторот на Нигерија, Ерик Чел, кој тактички совршено ги постави „Суперорлите“.
