Новак Ѓоковиќ веројатно поседува повеќе рекорди од било кој друг тенисер во историјата, но денешниот ден означува уште едно поместување на границите на невозможното. Најдобриот тенисер на сите времиња, кој моментално се наоѓа на 4-та позиција на АТП листата, ја започнува својата 860-та недела во Топ 5, со што официјално го сруши рекордот на Роџер Федерер.
До денес, Швајцарецот беше неприкосновен со 859 недели поминати во елитното друштво на петте најдобри, но Ѓоковиќ уште еднаш покажа дека неговата долговечност и доминација немаат рок на траење. Официјалното рангирање на АТП започна во август 1973 година, а листата на вечните сега изгледа вака:
- 860 недели: Новак Ѓоковиќ
- 859 недели: Роџер Федерер
- 837 недели: Рафаел Надал
Доминација каква што не е видена досега
Она што го прави овој рекорд уште поимпресивен е фактот што Ѓоковиќ речиси половина од овие 860 недели (точно 428) ги поминал на самиот врв како број 1 во светот. За споредба, Федерер на првата позиција помина 310 недели.
Статистиката покажува дека Србинот поминал дури 49,8% од своето време во Топ 5 на првото место, додека неверојатни 88,8% од тој период бил во најдобрите тројца тенисери на планетата. Еве како се распоредени неговите недели во Топ 5 по позиции:
- Број 1: 428 недели
- Број 2: 171 недела
- Број 3: 165 недели
- Број 4: 59 недели (вклучувајќи ја и денешната)
- Број 5: 37 недели
Следниот рекорд е веќе на повидок
Новак не планира да застане тука. Оваа недела е негова 939-та во кариерата помината меѓу Топ 10 играчите, што е втор најдобар резултат во историјата по Федерер (968). Доколку 24-кратниот Грен слем шампион го задржи своето место во светската елита, овој рекорд би можел да падне веќе во ноември оваа година.
Иако помладата генерација предводена од Алкараз и Синер силно притиска, Ѓоковиќ продолжува да ги „брише“ имињата на своите најголеми ривали од историските книги, потврдувајќи дека статусот на G.O.A.T. не е само субјективно мислење, туку сурова статистичка реалност.
