Премиер лигата денеска официјално го казни лондонски Челси со парична казна од 10 милиони фунти и условна едногодишна забрана за регистрирање нови фудбалери. Казната се однесува на финансиски прекршоци направени во ерата на Роман Абрамович, откриени по детална истрага на новите сопственици.
Условна казна: „Сините“ сè уште можат да купуваат
Најважната вест за фановите е дека забраната за трансфери на првиот тим е условна во период од две години. Тоа значи дека Челси ќе може нормално да купува играчи летово, под услов да не направи нов сличен прекршок во наредните 24 месеци. Премиер лигата потврди дека нема да има спортски санкции како одземање бодови, што е огромно олеснување за тимот од „Стемфорд Бриџ“.
Удар по Академијата: Девет месеци без нови млади таленти
Сепак, не помина сè безболно. Челси доби директна забрана од 9 месеци за регистрирање играчи во својата академија. Оваа рестрикција стапува на сила веднаш и се однесува на млади фудбалери кои веќе биле регистрирани во други англиски клубови (EFL или Премиер лига). Ова е сериозен удар за клубот кој е познат по агресивното регрутирање на најдобрите таленти во Британија.
За што станува збор?
Според извештајот на „The Athletic“, истрагата открила дека во периодот меѓу 2011 и 2018 година, Челси исплатил над 23 милиони фунти на нерегистрирани агенти и сомнителни субјекти при трансферите на легендите како:
- Еден Азар
- Вилијан
- Самуел Ето
- Немања Матиќ
Вкупно биле исплатени речиси 48 милиони фунти преку сомнителни канали. Новите сопственици предводени од Тод Боли сами ги пријавиле овие неправилности до УЕФА и Премиер лигата веднаш по преземањето на клубот, што се смета за олеснителна околност. Да не беше оваа соработка, Челси веројатно ќе се соочеше со директна двегодишна забрана за трансфери.
