Ракометниот клуб ГРК Охрид излезе со две клучни информации за јавноста поврзани со ростерот и повредите на играчите од бековската линија. Вестите се однесуваат на средниот бек Ловро Јотиќ и десниот бек Предраг Вејин.
Успешна операција за Ловро Јотиќ
Од клубот информираа дека Ловро Јотиќ, кој се повреди уште на почетокот на шампионатот, успешно ја помина хируршката интервенција.
Јотиќ се здоби со тешка повреда на предниот вкрстен лигамент (ACL) на натпреварот од 5. коло против ГРК Тиквеш одигран во СРЦ „Билјанини Извори“. Иако операцијата е успешна, искусниот среден бек го чека долг период на рехабилитација и закрепнување, поради што ќе отсуствува од терените подолго време.
„На Ловро му посакуваме добро здравје и што побрзо да се врати на ракометните терени“, стои во известувањето на клубот.
Предраг Вејин спогодбено го раскина договорот
Во исто време, ГРК Охрид објави дека спогодбено го раскина договорот со десниот бек Предраг Вејин.
Причината за разделбата е поврзана со нецелосното опоравување на српскиот ракометар по повредата здобиена додека настапуваше за Олимпијакос. Поради неможноста целосно да се врати во тренажен процес и да му се стави на располагање на тренерот Ројевиќ, клубот и Вејин се согласија на раскин на соработката.
И на Вејин клубот му посака добро здравје и брзо враќање на ракометните терени.
