Менаџерот на Манчестер Сити, Пеп Гвардиола, и голманот Џанлуиџи Донарума се појавија пред медиумите во Мадрид на официјалната прес-конференција пред вечерашниот прв натпревар од осминафиналето во Лигата на шампионите. Иако Реал Мадрид се соочува со огромни кадровски проблеми, Гвардиола јасно порача дека неговиот тим не смее да се опушти ниту за момент.
„Реал е фаворит, нивната историја зборува сама за себе“
Гвардиола покажа огромен респект кон својот стар ривал, нагласувајќи дека статусот на „кралскиот клуб“ во ова натпреварување е уникатен.
„Јас не сум тој што ќе го потцени овој клуб, неговите играчи, тренерот и сè што претставува овој амблем. Знам колку е тешко да се соочиш со Реал во ова натпреварување. Тие имаат повреди, но Мадрид си е Мадрид. Мораме да бидеме на нашето максимално ниво за да се надеваме на премин во следната фаза“, изјави Гвардиола.
Шпанскиот стратег посебно го истакна Винисиус Жуниор како најголема закана, нагласувајќи дека планот на Сити е да го изолира Бразилецот и да го вклучи што е можно помалку во играта преку постојан притисок при губење на топката.
Донарума: Жал ми е за Мбапе, но неговата замена е исто толку опасна
Италијанскиот голман на Сити, Џанлуиџи Донарума, исто така не штедеше пофалби за домаќинот, но и изрази жалење за отсуството на поранешниот соиграч, Килијан Мбапе.
„Имав среќа да играм со Килијан, тој е еден од најдобрите во светот. Како голман, предност е кога не се соочуваш со таков играч, но мораме да бидеме подеднакво внимателни со неговата замена. Се надевам дека ќе биде подготвен за реваншот бидејќи го заслужува тоа“, изјави Италијанецот за Мбапе.
За Куртоа рече: „Имам одличен однос со Тибо. Тој е еден од најсилните голмани на светот со години наназад. Сè уште имам многу да учам од него“.
Донарума заклучи дека Реал е еден од главните фаворити за титулата токму поради историјата на клубот, но дека Сити доаѓа во Мадрид со желба да ја изненади домашната публика и да го менаџира „пеколот“ на „Бернабеу“.
