Третата слободна тренинг сесија пред историското прво Гран При на новата улична патека во Мадрид донесе вистинска драма, две црвени знамиња и многу работа за механичарите. Лидерот во генералниот пласман, Кими Антонели (Мерцедес), постави најдобро време, но сесијата остана во сенка на инцидентите во кои главни актери беа Луис Хамилтон и младиот Оливер Берман.
Судирот на Хамилтон и бизарниот обид за враќање во боксот
Најголемото внимание го привлече инцидентот на Луис Хамилтон. Британскиот ветеран во Ферари го извозе најбрзиот втор сектор на патеката, но во последниот свиок силно ги блокираше сопирачките и директно со предниот дел се заби во заштитната „Текпро“ ограда.
Она што следеше беше вистинска драма на тимското радио. Иако Ферари инсистираше Хамилтон веднаш да го изгаси болидот, тој вклучи во рикверц и се обиде да стигне до боксот, и покрај тоа што предното крило стружеше по асфалтот и предизвика дупнување на предната десна гума. Овој бизарен обид заврши дури откако неговиот инженер, Карло Санти, му пренесе директна наредба од ФИА: „Ова е формално барање, ФИА ни порача да застанеш на најбезбедното место. Застани пред 12-тиот свиок (Ла Монументал).“
Поправката на оградата траеше долго, поради што дирекцијата на трката направи невообичаен потег и го паузираше часовникот за да не истече времето предвидено за тренингот.
When Lewis Hamilton tried to nurse his damaged Ferrari back to the pit lane
— Formula 1 (@F1) September 12, 2026
However, he couldn’t quite make it all the way 😬#F1 #SpanishGP pic.twitter.com/qMZRETzKix
Антонели лета, Берман го уништи Хасот
По 39-минутниот прекин, возачите добија уште 15 минути за брзи кругови. Шарл Леклер накратко изби на првото место, но Антонели веднаш одговори со најбрзиот круг на викендот (1:32.797), оставајќи го возачот на Ферари на второто место со 0.166 секунди заостанување. Зад нив се пласираа двете формули на Мекларен, Оскар Пијастри и Ландо Норис, додека Макс Верстапен го комплетираше топ 5 пласманот.
Завршницата на сесијата донесе нов шок. Оливер Берман загуби контрола на влезот во свиокот 10 (пред славниот „Ла Монументал“) и извртувајќи се наназад силно удри во заштитната ограда. Британскиот талент мина без повреди, но неговиот Хас претрпе огромни оштетувања на левата страна, ставајќи го под голем знак прашалник неговиот настап во квалификациите.
Алекс Албон беше единствениот кој не постави време откако го оштети својот Вилијамс по благ контакт со ѕидот во претпоследниот свиок.
Топ 10 времиња од Т3:
- Кими Антонели (Мерцедес) 1:32.797
- Шарл Леклер (Ферари) +0.166
- Оскар Пијастри (Мекларен) +0.189
- Ландо Норис (Мекларен) +0.236
- Макс Верстапен (Ред Бул) +0.375
- Џорџ Расел (Мерцедес) +0.702
- Лијам Лосон (Ред Бул) +1.105
- Нико Хулкенберг (Ауди) +1.136
- Луис Хамилтон (Ферари) +1.487
- Габриел Бортолето (Ауди) +1.491
