Арсенал доби нов удар во офанзивната линија, Кај Хаверц ќе паузира поради повреда на коленото.
Германскиот репрезентативец (26) не се појави на утринскиот отворен тренинг на Емирати во средата, а проценките за сериозноста на повредата сè уште се во рана фаза. Засега не е познато колку долго ќе отсуствува, но јасно е дека Арсенал би можел да остане без еден од клучните напаѓачи.
Иако во летниот преоден рок “топџиите” го донесоа Виктор Ѓокереш, тој во моментов е единствениот здрав и природен напаѓач во тимот на Микел Артета. Леандро Тросар, кој неодамна потпиша нов договор, има искуство на таа позиција, додека Микел Мерино во минатата сезона неколкупати играше како “лажна деветка”, но тие не се стандардни напаѓачи.
Габриел Жесус и понатаму се рехабилитира од тешката повреда на вкрстените лигаменти од јануари и нема да биде на терените уште подолг период.
Ова е втора повреда за Хаверц во 2025 година. Во февруари тој ја скина задната ложа на подготовките во Дубаи и отсуствуваше на 18 натпревари во Премиер лигата и Лигата на шампионите. Се врати дури во последните две кола минатата сезона, и тоа како резервист.
Хаверц во неделата стартуваше во дербито против Манчестер јунајтед на Олд Трафорд, а Артета го извади по еден час игра за да му даде шанса на Ѓокереш.
Од неговото пристигнување од Челси во 2023 година, Германецот одигра 88 натпревари и постигна 29 голови за Арсенал.
Што значи ова за Арсенал?
И покрај доаѓањето на Ѓокереш, Хаверц остана централна фигура во плановите на Артета. Неговата нова повреда повторно ја става под прашање длабочината во нападот, а Арсенал сега мора по секоја цена да го одржи Ѓокереш здрав и брзо да го адаптира во Премиер лигата.
Во случај прогнозата за Хаверц да биде посериозна и да има потреба од операција, клубот би можел повторно да излезе на пазарот и да донесе уште едно засилување за нападот.
Следниот предизвик за “топџиите” е веќе во сабота, во дуелот со Лидс Јунајтед на Емирати.
