Македонската фудбалска репрезентација денеска официјално ги започна подготовките за историскиот плеј-оф натпревар против Данска. Под палката на новиот селектор Гоце Седлоски, „рисовите“ го одработија првиот тренинг во комплексот „Петар Милошевски“, со една единствена мисла – пласман на Светското првенство.
Атмосферата во таборот е на највисоко ниво, а посебно внимание привлече едно од новите имиња на списокот, бекот на Борац Бања Лука, Себастијан Херера.
Херера: „Го сонував овој дрес, подготвен сум да го оставам срцето на терен“
За Херера, повикот во македонскиот национален тим е круна на кариерата. Натурализираниот дефанзивец не ја криеше возбудата што конечно ќе дебитира за Македонија во вака важен момент.
„Ова е најголемото нешто што можеше да ми се случи во кариерата. Долго време го сонував овој дрес и пресреќен сум што моментот конечно дојде. Тука сум за да го дадам максимумот и да помогнам на тимот со сето мое срце“, истакна Херера во својата прва изјава како репрезентативец.
Тој додаде дека конкуренцијата на неговата позиција, каде што неприкосновен е искусниот Езџјан Алиоски, му дава дополнителен мотив да се докаже пред селекторот Седлоски.
Данска е моќна, но Македонија верува во чудо
Иако Данците важат за фаворити на хартија, особено пред својата публика во Копенхаген, Херера верува дека Македонија има сили за изненадување.
„Знам дека не чека тежок меч на 26 март. Данска е силна, но ние треба да гледаме само во нашиот двор. Мораме да бидеме максимално мотивирани и да дејствуваме како вистински тим. Сметам дека шансите се 50-50 и сè зависи од нашиот пристап. Зошто да не се надеваме на позитивен резултат и пласман во големото финале?“, дециден е фудбалерот на Борац.
Седлоски го крои планот за „Паркен“
Селекторот Седлоски веќе го крои планот како да се неутрализира данскиот напад. Поголемиот дел од репрезентативците веќе пристигнаа во Скопје, а комплетирањето на тимот се очекува во текот на вечерните часови. Со Столе Димитриевски во врвна форма (како што видовме во Севиља) и новата енергија во средниот ред, Македонија има право да верува во нов голем подвиг.
