Вистинската Ига Швјонтек се врати на земјените терени во Рим, демонстрирајќи ја својата препознатлива сила на подлогата каде што веќе трипати во кариерата кревала пехар. Полската тенисерка денеска на „Форо Италико“ уште еднаш покажа зошто е страв и трепет на оваа подлога, прегазувајќи ја Џесика Пегула со 6-1, 6-2 за само 67 минути доминација.
Ова четвртфинале во Рим не беше само обичен меч, туку вистинска изјава за моќ. Швјонтек, која по трите претходни титули во „вечниот град“ (2021, 2022 и 2024) точно знае како се гази до финалето, не и остави на Американката ниту трошка надеж. Пегула едноставно немаше одговор за длабочината и силината на ударите на Ига, која со седум винери во првиот сет ја најави катастрофата на петтата носителка.
Ефектот на „шпанската врска“
Она што е очигледно во играта на Ига во Рим е „ракописот“ на нејзиниот нов тренер, Франциско Роиг. Поранешниот соработник на Рафа Надал очигледно ги вратил работите на почеток, па Швјонтек повторно игра со екстремен топ-спин и трпение, што ја прави речиси непобедлива во долгите размени од основната линија.
„Тактички сè имаше смисла. Чувствувам дека повторно можам да додадам многу спин и моќ во форхендот, токму како пред неколку години“, изјави Швјонтек по победата.
Интересно е што Полјакињата воопшто не се потпира на сервис-волеј игра или на лесни поени од почетниот удар. За неа, на оваа подлога, сè е во контролата на поенот од првиот ритерн, а денеска против Пегула тоа функционираше беспрекорно.
Чекор до нова круна
Со овој триумф, Швјонтек го обезбеди своето 22-ро полуфинале на ВТА 1000 турнирите и прво меѓу четирите најдобри во 2026 година. По низата четвртфинални падови на почетокот на сезоната, Ига конечно „кликна“ во вистински момент, испраќајќи застрашувачка порака до сите ривалки пред Ролан Гарос.
Следна пречка на патот до нејзиниот четврти пехар во Рим ќе биде подобрата од дуелот меѓу Елена Рибакина и Елина Свитолина. Но, со ваква интензивност и стабилност во ударите, Ига изгледа како тенисерка која сама си ја крои судбината на теренот.
