Постојат моменти во историјата кога институциите не се судат според она што се подготвени да го прифатат, туку според она за кое одбиваат да направат компромис. Ова е еден од тие историски денови. Денот кога фудбалот, онаа најискрена „балетска претстава на работничката класа“, застана на цртата и гласно кажа: ДОСТА Е!
Обидот на ФИФА и нејзиното раководство во тајност да го продадат сопственичкиот удел на Светското првенство на приватни инвеститори, наиде на непробоен ѕид. Фудбалот не е криптовалута, не е акција на берза и дефинитивно не е производ кој може да се стави во корпоративен излог за да ги задоволи апетитите на акционерите.
Европа обединета како никогаш досега, Ултиматум и бојкот!
УЕФА и нејзините 55 национални асоцијации, меѓу кои гордо стои и нашата Фудбалска Федерација на Македонија (ФФМ), застанаа како еден. Во соопштение кое одекна како гром низ спортскиот свет, Европа едногласно и недвосмислено го отфрли предлогот на ФИФА.
„Светското првенство не може да се третира како инвестициски производ. Тоа е едно од најголемите спортски наследства на фудбалот, градено со генерации од играчи, репрезентации и навивачи низ секој континент,“ стои во моќното соопштение на европската куќа на фудбалот.
Пораката е брутално јасна: Ниту една европска репрезентација нема да учествува во натпреварувањата на ФИФА сè додека овие планови се живи, или додека не се дадат правно обврзувачки гаранции дека ФИФА никогаш повеќе нема да го отвори своето управување за приватна сопственост. Ова не е само одлука, ова е револуција за спас на душата на играта!
Америка се буди: КОНКАКАФ се приклучува кон отпорот
Дека алчноста на ФИФА ја преминала секоја граница, потврди и реакцијата од другата страна на Атлантикот. КОНКАКАФ и нејзините 41 земја-членка одржаа итен состанок и исто така го отфрлија предлогот за формирање на таканаречената компанија „FIFA Forward Enterprise“.
Тие изразија длабока загриженост поради недостатокот на транспарентност, вештачки кратките рокови и фактот што по најпрофитабилното Светско првенство во историјата, ФИФА воопшто бара приватен капитал наместо да ги користи сопствените резерви. Иако нивниот речник беше нијанса подипломатски, пораката остана иста, иднината на фудбалот и неговото најголемо богатство мора да останат во рацете на фудбалското семејство.
Нашиот став: Браво Фудбал, не се давај!
Навивачите ширум светот експлодираа од радост на социјалните мрежи, славејќи го овој потег и повикувајќи на оставка на претседателот Џани Инфантино. Многумина ги поврзаа овие потези со неговите врски со високи политички фигури и милијардери кои сакаат да профитираат од спортот.
Ние во Спортска Станица длабоко веруваме дека спортот е наследство, а не производ. Како што јасно стои во нашиот Вајт Пејпер, ние ја отфрламе културата на експлоатација на спортот за брза заработка, без разлика дали доаѓа од обложувалници, или од приватни корпоративни фондови кои сакаат да го купат Светското првенство.
Немаме морално право да го продадеме она што го чуваме за следните генерации. Затоа, од срце порачуваме: Браво за УЕФА! Браво за ФФМ! Браво КОНКАКАФ! Браво Фудбал, држи се не се давај!
