Подготовките во Анталија донесоа тежок резултатски удар за ФК Вардар. Најтрофејниот македонски клуб вчера претрпе убедлив пораз од чешкиот прволигаш ФК Јаблонец со резултат 2-6 (0-4).
Сепак, она што повеќе загрижува од самиот резултат е вкупната слика околу клубот, од организациските пропусти, преку хаосот со Роџерс Мато, па сè до тивките заминувања на играчи кои беа најавувани како засилувања.
Лекција од Чешка: Фудбалска и маркетиншка
Чешкиот тим, кој е на 3-тото место во нивната силна лига, доминираше од првата минута. Јан Храмоста постигна хет-трик, а во листата на стрелци се запишаа и Сухан, Панталон и Пушкач. За Вардар, стрелци беа Омерагиќ и Николовски во финишот, кога противникот веќе го намали темпото.
Мора да се оддаде признание на ФК Јаблонец, не само за играта, туку и за начинот на кој еден прогресивен клуб треба да се води и маркетиншки да се покрива. Нивниот професионален пристап, деталните извештаи и транспарентноста на социјалните мрежи се модел кон кој Вардар треба да цели, наместо да се занимава со импровизации.
Тивко збогување: Чимбембе веќе не е вардарец
Во сенка на овие настани, Вардар ја потврди разделбата со Ворен Чимбембе. Играчот од Конго, кој дојде со педигре од францускиот Мец и требаше да биде носител, си заминува неславно.
Со само 7 настапи и еден гол, Чимбембе не ги оправда очекувањата и се покажа како уште едно промашено засилување во низата.
