Поранешниот менаџер на Ливерпул, легендарниот Јирген Клоп, застана во одбрана на најскапото засилување во историјата на клубот, Флоријан Вирц, испраќајќи јасна порака до англиските медиуми и експерти кои го критикуваат младиот Германец.
Вирц, кој пристигна од Баер Леверкузен за сума која може да достигне и до 150 милиони евра, сè уште го чека својот прв гол или асистенција во дресот на “црвените”. По серијата од три порази на Ливерпул, тој се најде на удар на критики, а на последниот натпревар против Челси беше оставен и на клупата за резерви.
“Дискусијата е претерана, тој е талент на столетието”
Клоп, кој сега е дел од раководството на Ред Бул, смета дека целата дебата е непотребна и претерана.
“За Флоријан Вирц не треба воопшто да се грижите, бидејќи неговиот квалитет е извонреден. Дискусијата е малку претерана”, изјави Клоп за германските медиуми.
“Ливерпул штотуку изгуби три натпревари по ред, нешто што не се случило долго време, и затоа се зборува за овие работи. Но, ви гарантирам дека луѓето во клубот воопшто не се загрижени за јавните дискусии. Сè ќе биде во ред”, додаде тој.
Клоп не штедеше зборови за да го опише потенцијалот на Вирц: “Тој е талент на столетието и во одреден момент, тој повторно ќе го покажува тоа на секој натпревар, како што го правеше во Леверкузен. Ако некој се грижи – не мора! Можете да престанете со тоа.”
Дебатата на фановите: Дали Клоп претерува?
Оваа изјава на Клоп, особено делот за “талент на столетието”, предизвика лавина од реакции на социјалните мрежи. “Талент на столетието? Тоа би значело дека е еден од најдобрите тројца играчи во историјата. Мислам дека Клоп малку претера”, “Клоп ова го има кажано и за Мартинели, тој едноставно сака да ги мотивира играчите”, “Дали е воопшто подобар од Мусиала?”, беа само дел од коментарите.
Други, пак, посочија дека “Jahrhunderttalent” (талент на столетието) е честа германска фраза која повеќе значи “генерациски талент”, отколку буквално “најдобар во 100 години”.
На крајот, едно е сигурно: притисокот врз Флоријан Вирц е огромен. Но, кога зад вас стои авторитет како Јирген Клоп, тогаш знаете дека имате квалитет. Останува само да го покажете тоа на теренот.
