Никола Јокиќ не е само МВП во НБА. Тој е МВП и кога ја носи Србија на своите плеќи! Во пеколната атмосфера во Рига, пред 11.000 главно летонски навивачи, “орлите” успеаја да ја совладаат Летонија со 84-80 и да го обезбедат своето место во осминафиналето на Евробаскет 2025.
Иако капитенот Богдан Богдановиќ отпадна поради повреда на задната ложа, Србија најде херој во својот најголем играч. Летонците се обидоа да го претворат Јокиќ во стрелец наместо во додавач и токму тоа им се врати како бумеранг. Центарот на Денвер заврши со рекордни 39 поени во националниот дрес, додавајќи и 10 скокови.
Србија цело време водеше со двоцифрена предност благодарение на тројките на левучарите Марко Гудуриќ, Алекса Аврамовиќ и Огњен Добриќ. Но, драмата беше неминовна. Дејвис Бертанс погоди тројка од “пола сала”, Артурс Куруц донесе експлозија на трибините со уште една тројка и на минута до крај резултатот беше само плус 2 за Србија (82-80).
Тогаш Јокиќ ја презеде одговорноста: ладнокрвно реализираше две слободни фрлања и стави точка на натпреварот. Последните 40 секунди минаа без кош, а Србија славеше голема победа и пласман во нокаут фазата.
“Орлите” ја добија битката под кошот со 42-22 во поени од рекетот, покажувајќи зошто никој не сака да игра против нив. Јокиќ не само што постави личен рекорд (претходниот беше 32 поени против Италија во 2022), туку уште еднаш ја запали српската публика, која го награди со скандирања “МВП, МВП!”.
📊 39 PTS 10 REB 4 AST
🇷🇸 The Joker was unstoppable once again, as Serbia punched their ticket to the #EuroBasket Round of 16! pic.twitter.com/ynF30B0bx2
— FIBA EuroBasket (@EuroBasket) August 30, 2025
Покрај него, Филип Петрушев се рехабилитираше по исклучувањето во претходниот меч, завршувајќи со 12 поени.
За Летонија, поразот боли, но играта конечно изгледаше пофлуидно, со надеж дека против Португалија и Чешка ќе најдат пат до победа. Србија е на 3-0 и веќе гледа кон осминафиналето, но за Јокиќ и дружината тоа е само првиот чекор во амбицијата да стигнат до самиот врв.
