Каква трка во Монтреал: Антонели со четврта победа во низа по „војната“ со Расел!

МоторспортФ1
Извор: https://www.formula1.com/
 

Објавено:

Големата награда на Канада донесе една од највозбудливите и најдраматични трки во поновата ера на Формула 1. Младиот Кими Антонели стигна до својата четврта последователна победа во шампионатот, искористувајќи го големиот дебакл и дефект на неговиот тимски колега Џорџ Расел, кој се откажа во моментите кога двајцата водеа безмилосна војна на патеката.

Со овој триумф во Монтреал, италијанското чудо од дете ја зголеми својата предност на врвот во генералниот пласман на огромни 43 бода.

Војна на „сребрените стрели“ и брутален бес на Расел

Почетниот дел од трката помина во знак на бруталниот дуел меѓу двајцата возачи на Мерцедес. Расел и Антонели буквално ги тестираа границите на трпението на тимот, разменувајќи си ги позициите во неколку наврати со допири на болидите и триење на гумите. Трката кулминираше во 24-от круг кога по меѓусебен контакт во последната кривина, Антонели беше принуден да прелета преку тревата и излезе како лидер, по што бурно реагираше на тимското радио на одлуката да ја врати позицијата.

Ситуацијата стана толку тензична што мораа да реагираат и инженерите од боксот со сериозна закана. „Мораме да го исчистиме ова тркање. Ни треба чиста борба. Ако не можете да возите уредно, ќе мора да ви забраниме да се тркате меѓу себе. Ова е порака за двата болида“, нареди Питер Бонингтон.

Но, војната заврши со скршено срце за Британецот во 30-от круг. Болидот на Расел доживеа ненадеен дефект на погонската единица, поради што тој мораше да го паркира возилото крај патеката. Расел беше толку бесен што револтирано го фрли заштитникот за глава (наслонот) надвор од болидот, инцидент кој веднаш беше забележан од редарските судии.

Мајсторија на Хамилтон во Ферари и прв подиум за Макс

По повлекувањето на Расел и активирањето на виртуелното возило за безбедност, Антонели изгради комотна предност на чело на колоната, која на крајот изнесуваше сигурни 10.7 секунди.

Вистинската драма во финишот се случуваше зад неговиот грб. Седумкратниот светски шампион Луис Хамилтон, возачот на Ферари, изведе фантастичен маневар во последните кругови и успеа да го претекне Макс Верстапен во Ред Бул за да го зграпчи второто место. Верстапен на крајот заврши како трет, што за него е прв подиум во оваа турбулентна сезона.

Кошмар на Мекларен и тактички дебакл со гумите

Додека Мерцедес и Ферари славеа, екипата на Мекларен преживеа вистинска резултатска катастрофа. Иако Lандо Норис на почетокот го презеде водството, одлуката на тимот трката да ја започне на „интермедиум“ гуми за дожд на целосно сува патека се покажа како катастрофална. Норис и Оскар Пјастри мораа да влезат во бокс уште по првите два круга, губејќи по три секунди по круг.

Кошмарот беше комплетиран во 42-от круг кога Норис се откажа поради дефект на менувачот, додека Пјастри заработи казна од 10 секунди поради тоа што го прегази Алекс Албон (кој исто така се откажа), па на крајот заврши дури на 11-то место надвор од бодовите.

Меѓу првите десет и до бодови во Канада стигнаа уште и Исак Хаџар (Ред Бул) на петтото место и покрај двете заработени казни, Франко Колапинто со одлична трка за Алпин на шестото место, Лиам Лосон, Пјер Гасли, Карлос Саинц и Оли Берман кој го зема последниот бод за тимот на Хаас.

РЕЗУЛТАТИ ОД ГМ НА КАНАДА (ТОП 10):

  1. Кими Антонели (Мерцедес) 1:28:15.758
  2. Луис Хамилтон (Ферари) +10.768s
  3. Макс Верстапен (Ред Бул) +11.276s
  4. Шарл Леклер (Ферари) +44.151s
  5. Исак Хаџар (Ред Бул) +1 круг
  6. Франко Колапинто (Алпин) +1 круг
  7. Лиам Лосон (Рејсинг Булс) +1 круг
  8. Пјер Гасли (Алпин) +1 круг
  9. Карлос Саинц (Вилијамс) +1 круг
  10. Оли Берман (Хаас) +1 круг

Следете нè: Facebook | Instagram | X

 

Можеби ќе те интересира...

Тим Спортска Станица
Тим Спортска Станицаhttps://sportstation.mk
Официјалниот профил на уредничкиот тим на SportStation.mk.

Поврзано

 
 

Тазе објавено