Македонскиот Дејвис куп репрезентативец, Калин Ивановски, забележа одличен почеток на ИТФ М25 турнирот во Загреб, Хрватска. Нашиот најдобар тенисер успешно ја скокна првата пречка во поединечна конкуренција откако за само 82 минути игра славеше над чешкиот тенисер Јан Фацек со максимални 2-0 во сетови (6-2, 6-3).
Ивановски уште од самиот почеток наметна свое темпо на игра. Во првиот сет, тој направи два рани брејка – во првиот и во петтиот гем, со што брзо стигна до недостижна предност од 5-1. Сетот рутински го затвори со сигурни 6-2.
Вториот сет донесе нешто поголема борба и изедначена игра на двајцата тенисери сè до резултат 3-3. Тогаш македонскиот ас го подигна нивото и направи клучна мини-серија од три освоени гемови по ред, вклучувајќи и два брејка. Натпреварот го заврши откако ја реализираше својата втора меч-топка за конечни 6-3.
Во следната рунда, Ивановски ќе се соочи со Павлос Циципас (братот на познатиот грчки тенисер Стефанос Циципас). Претставникот на Грција во своето прво коло славеше со 2-0 во сетови против Кирил Кивацев, со што си закажа меѓусебен дуел со македонскиот репрезентативец.
Двојна програма за македонските тенисери
Покрај Ивановски, утре (четврток) на терените во Загреб ќе настапи уште еден македонски репрезентативец. Првиот носител на турнирот, Олег Приходко, својот настап во поединечна конкуренција ќе го има против Хлеб Секачов.
Дополнително, нашите тенисери ги очекуваат предизвици и во конкуренција на двојки. Калин Ивановски ќе настапи во пар со Амар Хусеиновиќ, додека Олег Приходко ќе игра заедно со Андреј Чепелев. Ова значи дека и Ивановски и Приходко ќе имаат исклучително напорна двојна програма во текот на утрешниот ден.
