Манчестер Јунајтед под водство на Мајкл Карик изгледа како препороден тим со 100% учинок по големите победи над Манчестер Сити и Арсенал, но тоа не е доволно за да ги смири страстите на трибините. Иако „црвените ѓаволи“ влегоа во топ 4 за првпат сезонава, навивачката група „1958“ најави масовен протест пред неделниот дуел со Фулам.
Протест против сопствениците, а не против резултатите
Организаторите очекуваат меѓу 5.000 и 6.000 навивачи да учествуваат во маршот што ќе започне еден час пред натпреварот. Нивната порака е јасна – незадоволството е насочено кон сопствениците и „нефункционалниот модел на управување“, а не кон она што Карик го прави на теренот.
„Нашиот протест никогаш не бил за перформансите на теренот. Ние го оценуваме сопственичкиот модел кој постојано не успева во последните 21 година“, порачуваат од групата „1958“.
Карик фокусиран на поддршката од трибините
Мајкл Карик, кој во својата автобиографија своевремено ги нарече Глејзери „одлични сопственици“ (став со кој малкумина навивачи се согласуваат), овојпат беше дипломатски настроен. Тој истакна дека протестот не го доживува како личен напад врз него или играчите.
„Целосно ги почитувам поддржувачите. Не сум навреден од тоа, а сигурен сум дека не се ни играчите. Поддршката што ја чувствуваме на стадионот во последно време е на највисоко ниво. Конекцијата што ја изградивме овие две недели е специјална и тоа е она на што сакаме да градиме во иднина“, изјави Карик.
Иако Карик се обидува да го задржи фокусот на фудбалот, јасно е дека „Театарот на соништата“ ќе биде место на поделени емоции во недела – еуфорија поради враќањето во форма и револт кон ложата каде седат Глејзери и сер Џим Ретклиф.
