Раководството на Кошаркарската федерација на Македонија (КФМ) продолжува со активната меѓународна соработка. Делегација на федерацијата, предводена од потпретседателот Младен Ѓуроски и генералниот секретар Томче Стојчевски, оствари значаен работен состанок со челниците на ФИБА Европа.
Средбата поминала во конструктивна атмосфера, при што била потврдена одличната релација помеѓу македонската куќа на кошарката и европското раководно тело.
Усогласување на актите за поголема транспарентност
Од ФИБА Европа пристигна висока оценка за досегашното работење на КФМ, кое е оценето како успешно и континуирано. Клучен фокус на состанокот бил ставен на правната регулатива. Договорено е вложување на заеднички напори за целосно усогласување на актите и регулативите на ФИБА со внатрешните прописи на КФМ.
„Целта е подобрување на функционалноста, транспарентноста и усогласеноста во работењето“, информираат од Федерацијата.
Двете страни изразија подготвеност за продлабочување на соработката во интерес на развојот на кошарката и подигнување на организациските стандарди во Македонија.
