Светот на Формула 1 би можел наскоро да добие уште еден моќен играч, овојпат од истокот. Кинескиот гигант за електрични возила, BYD, официјално го потврди својот интерес за влез во најбрзиот циркус на светот како дванаесетти тим на гридот.
По гласините кои кружеа минатиот месец, потпретседателката на компанијата, Стела Ли, за време на саемот за автомобили во Пекинг потврди дека веќе се одржани прелиминарни разговори со првиот човек на Ф1, Стефано Доменикали.
Разговори во Шангај и глобални амбиции
BYD во изминатите неколку години доживеа неверојатна експанзија на пазарот на електрични возила, а влезот во Формула 1 се гледа како клучен чекор за дополнително зајакнување на нивниот глобален профил.
„Се сретнавме со Стефано Доменикали во Шангај и сме во постојан контакт. Ја сакам Формула 1 бидејќи таа е спој на страст и култура, тоа е спорт за кој луѓето сонуваат да бидат дел од него“, изјави Стела Ли за Sportmediaset.
На прашањето дали влезот е реална опција, таа кратко одговори: „Да, тоа е нешто за што во моментов дискутираме“. Кинескиот гигант разгледува три опции: целосно нов тим (како Кадилак), влез како производител на погонски единици или стратешко партнерство со постоечка екипа.
Отмар Шафнауер исто така во трка за 12-то место
BYD не е единствениот претендент за проширување на гридот. Поранешниот шеф на неколку Ф1 тимови, Отмар Шафнауер, кој сега е дел од Van Amersfoort Racing, исто така работи на проект за формирање на дванаесетти тим.
Шафнауер, заедно со мнозинскиот сопственик Рафаел Виљагомез Постариот, претходно се бореше за 11-то место кое му припадна на Кадилак, но сега ги пренасочува силите кон евентуалното 12-то место. Нивните планови вклучуваат и потенцијално влегување во Индикар серијата доколку Ф1 вратите останат затворени.
Со оглед на огромниот финансиски капацитет на BYD и нивната технолошка предност во ерата на електрификација, нивното присуство во Ф1 би можело целосно да го промени балансот на силите во спортот.
