Утревечер на стадионот „Билино Поље“ во Зеница, Босна и Херцеговина и Италија ќе се соочат во директна пресметка за пласман на Светското првенство. Влогот е огромен, притисокот е максимален, но додека светот очекува „фудбалска војна“, историјата нè потсетува на еден момент кој засекогаш ги поврза овие две нации.
Пред да започне битката на теренот, вреди да се навратиме на 6 ноември 1996 година – денот кога Италија стана многу повеќе од обичен противник за Босна.
Кога многумина се плашеа, „Азурите“ дојдоа
Во земја која штотуку излезе од страшна агресија, уништена и ранета, фудбалот беше последната работа на која некој мислеше. Многу репрезентации се плашеа да го посетат Сараево, барајќи неутрални терени и безбедносни гаранции. Но, Италија не се плашеше.
На тој ноемвриски ден, „Азурите“ предводени од легендарниот Ариго Саки, со ѕвезди како Паоло Малдини, Џанфранко Ѕола и Дино Баџо, пристигнаа во Сараево. Тоа беше гест на хуманост кој Босна и Херцеговина никогаш нема да го заборави. На стадионот „Кошево“, во атмосфера на солзи и надеж, Босна ја забележа својата прва официјална победа во историјата (2-1), но резултатот беше во втор план.
“GRAZIE ITALIA”: There are games that are much more than football. One of them was played on November 6, 1996 in Sarajevo.
— Bosnian Football (@BosniaNTBall) March 28, 2026
In a country that had just emerged from aggression, destroyed and wounded, Italy came when many others were afraid to.
It is a gesture that Bosnia and… pic.twitter.com/h4aOXgNCLQ
„Grazie Italia“! Почит која трае три децении
Тој натпревар беше порака до светот дека животот се враќа во Сараево. Италијанските фудбалери тогаш не играа само фудбал, тие лекуваа рани. Поради тој гест, италијанската репрезентација секогаш ќе има посебен статус и длабока почит кај секој навивач на „Змејовите“.
Утре во Зеница, емоциите повторно ќе бидат на врвот. Иако Федерико Димарко деновиве мораше да се правда за неговото славење со Един Џеко (што на Балканот брзо се толкува како ароганција), корените на овој дуел се многу подлабоки.
Утре играат пријатели, но само еден оди на Мундијалот
Босна сонува за нов историски успех, додека Италија, која не беше на Мундијал цели 12 години, го чувствува огромниот товар на нацијата. Џеко против неговите пријатели од Серија А, во градот каде фудбалот е религија.
Утре нека победи подобриот, но без разлика на исходот, навивачите во Босна и Херцеговина никогаш нема да престанат да велат: „Grazie Italia“. Бидејќи некои натпревари навистина се многу повеќе од само фудбал.
