Македонскиот репрезентативец Елиф Елмас и неговиот Наполи се освојувачи на италијанскиот Суперкуп! Во големото финале одиграно во Ријад, „наполитанците“ славеа сигурна победа над Болоња со 2-0, со што го кренаа првиот пехар од оваков тип во ерата на Антонио Конте.
Ова е трет трофеј во Суперкупот за тимот од Неапол, а посебно радува што нашиот „Дијамант“ имаше значајна улога во овој успех.
Елмас стартер, малку фалеше за гол
Тренерот Антонио Конте му укажа голема доверба на Елмас, ставајќи го во стартната постава во напаѓачкото трио, заедно со Хојлунд и Нерес. Македонецот одигра многу квалитетно и беше постојана закана за одбраната на Болоња.
Елмас имаше две одлични шанси да се запише во листата на стрелците:
- Во 10-тата минута, по одлично додавање од МекТоминеј, излезе пред голманот Раваља, но биеше во надворешниот дел од мрежата.
- Во 16-тата минута, се обиде со прецизен удар од работ на шеснаесетникот, но голманот на Болоња одбрани.
Елмас го напушти теренот во 68-мата минута испратен со аплаузи, отстапувајќи го местото на Ноа Ланг.
Шоу на Давид Нерес
Човек на одлука беше Бразилецот Давид Нерес. Тој го отвори резултатот во 39-тата минута со прекрасен гол, а победата ја потврди во 57-мата минута, искористувајќи грешка на противничката одбрана.
Со оваа победа, Наполи на најдобар можен начин ја завршува годината, а Елмас додава уште едно вредно парче сребро во својата колекција.
