Оваа недела (21 декември), СРЦ „Кале“ се претвора во центар на кошаркарската забава. Македонската кошаркарска федерација ја откри целосната листа на учесници за најатрактивните натпревари на „Ол-стар Скопје 2025“, а конкуренцијата ветува вистински спектакл.
Битка за воздушниот простор
Најголемото внимание традиционално го привлекува натпреварот во забивање. Оваа година ќе гледаме интересен дуел помеѓу домашната младост и странската атрактивност. Боите на „легионерите“ ќе ги бранат моќните Џејлин Билингсли (Чаир 2030), Рејмонд Сомервил (ТФТ) и Декариус Николас (Кожув). Но, македонските таленти како Дамјан Данев и Жарко Терзиевски (Вардар) или Атанасиј Трајанов (Водно Санс) се подготвени да покажат дека и тие имаат „федери“ во нозете.
Снајперисти на готовс
Кој има најмирна рака? За титулата најдобар тројкаш ќе се води жестока битка. Главниот фаворит Виктор Ефремовски (Работнички) ќе има сериозна конкуренција во Американците Остин Четмен и Џавон Грин, но и во младите надежи како Филип Сребров и Матеј Митревски.
Дамите исто така ќе ги наместат нишаните. Во женска конкуренција, силите ќе ги одмерат Даја Грин, Марија Николов, Сара Максимовска и други.
Иднината на паркетот точно на пладне
Кошаркарскиот маратон започнува уште во 12:00 часот. Како вовед во главниот настан, ќе се одигра натпреварот на идните ѕвезди од М20 лигата. Тимот „Next Step“ (во светли дресови) ќе се соочи со „Next Generation“ (во темни дресови), каде ќе ги видиме најголемите таленти на македонската кошарка на едно место.
