Еден од најголемите тениски воини на оваа генерација го одигра својот последен танц на црвената прашина во Париз. Стен Вавринка, трикратниот грен слем шампион и човек кој во своите најдобри денови играше тенис со кој ја уриваше дури и недопирливата „Голема тројка“, доживеа емотивна елиминација во првото коло на Ролан Гарос од холандскиот тенисер Јеспер де Јонг со 3-1 во сетови (6-3, 3-6, 6-3, 6-4).
Иако натпреварот заврши со пораз, преполниот стадион и комплетната тениска јавност приредија незаборавно испраќање за легендата од Лозана, кој со солзи во очите стави точка на својата париска приказна.
Спектакуларно збогување со емотивни пораки од најголемите ривали
По завршувањето на мечот, организаторите организираа специјална церемонија на која беа емитувани видео-пораки од неговите најголеми пријатели и ривали на теренот – Роџер Федерер, Рафаел Надал, Новак Ѓоковиќ, Гаел Монфис, Јаник Синер и седумкратниот грен слем шампион Карлос Алкараз.
Популарниот „Станимал“, прекар кој своевремено му го додели лично Роџер Федерер, не можеше да ги сокрие емоциите при обраќањето на неговите сонародници и колеги.
„Импресиониран сум од сè што постигна во кариерата. Уживај во овој момент“, порача големиот Федерер.
„Беше огромна инспирација за мене и за многу други тенисери. Чест ми е што можам да те наречам мој пријател“, додаде Новак Ѓоковиќ.
Со кнедла во грлото, 41-годишниот Швајцарец се обрати до публиката: „Тешко е… не сакам да се збогувам со вас на ова место“.
A few of Stan Wawrinka’s friends wanted to share a few words 🫶#RolandGarros pic.twitter.com/VbQ7kWwHXM
— Roland-Garros (@rolandgarros) May 25, 2026
😢#RolandGarros pic.twitter.com/ahTYzZfdyA
— Roland-Garros (@rolandgarros) May 25, 2026
Како швајцарскиот ураган ја сруши доминацијата на елитата
Вавринка ќе остане запаметен во историјата како тенискиот ураган со еден од најмоќните еднорачни бекхенди што спортот некогаш ги видел. Неговата златна ера започна во 2014 година на Австралија Овен, кога во четвртфиналето ја прекина серијата од 28 победи по ред на Новак Ѓоковиќ, а потоа во финалето го совлада и Рафаел Надал за својата прва голема титула.
Петнаесет месеци подоцна, во 2015 година, тој приреди вистинска сензација токму на „Филип Шатрие“. Во моментите кога Ѓоковиќ беше на врвот на својата моќ, Вавринка одигра вонземски тенис во финалето и со 4-6, 6-4, 6-3, 6-4 го освои Ролан Гарос. Серијата ја заокружи година и половина подоцна, кога повторно преку тогашниот прв рекет во светот, Новак Ѓоковиќ, го подигна и трофејот на УС Опен во 2016 година.
Париски бројки за тениска бесмртност
Резимето на Вавринка на грен слем турнирите зад себе остава бројки кои тешко ќе бидат надминати:
- 160 вкупни победи на грен слем турнирите во кариерата.
- 46 победи остварени на земјената подлога во Париз.
- 11 победи извојувани во маратонски мечеви од пет сетови на Ролан Гарос (единствен пред него на вечната листа е Гаел Монфис со 12).
- 8 пласмани во втората недела (осминафинале) на парискиот грен слем.
За време на неговиот нестварен тригодишен престој во Париз (2015-2017), Вавринка оствари скор од 18 победи и само 2 порази, период во кој ја зеде титулата (2015), играше полуфинале (2016) и загуби во големото финале од Кралот на земјата, Рафаел Надал (2017). Тенисот го губи својот автентичен воин, но неговото име засекогаш останува врежано во историјата на Ролан Гарос.
