Љубителите на фудбалот веќе четврт век не можат да ја замислат Лигата на шампионите без препознатливата топка со ѕвезди на Адидас. Сепак, како што пренесува „The Athletic“, оваа децениска традиција е пред сериозен предизвик. УЕФА официјално отвора тендер за нов снабдувач на топки, кој би стапил на сила од сезоната 2027/28.
Трка меѓу гигантите: Најк и Пума „фрлија око“ на ЛШ
Адидас е официјален партнер на УЕФА за топки уште од 2001 година, но сега пазарот се отвора. Според упатени извори, големите ривали Најк и Пума веќе пројавиле сериозен интерес за овој престижен договор.
УЕФА и нејзините партнери (UC3 и Relevent) сакаат да го максимизираат профитот. Гледајќи како неодамна ја прекинаа соработката со долгогодишниот партнер Heineken за да потпишат побогат договор со AB InBev, јасно е дека парите ќе играат клучна улога и кај топката.
Пума е новиот „агресор“ на пазарот
Додека Најк секогаш е тука како гигант, Пума е брендот кој во последно време „краде“ терен каде и да стигне. Тие веќе го презедоа приматот во:
- Премиер лигата (го заменија Најк по 25 години)
- Серија А
- Ла Лига
- Копа Америка
Нивната филозофија е едноставна: „Топката е во центарот на секој натпревар, таа е предметот кој го посакуваат сите навивачи и играчи. Преку неа сте присутни секаде, без да мора да купувате тим по тим или играч по играч“.
Што ќе се случи со Европа и Конференциската лига?
Моментално, топките за Лига Европа и Конференциската лига ги изработува францускиот Декатлон (со договор од 2024), но и овој договор истекува во 2027 година. УЕФА размислува дали да ги понуди сите три натпреварувања во еден „пакет“ или да ги продава посебно, со цел да привлече што е можно повисоки понуди.
Со оглед на тоа што Лигата на шампионите минатата сезона ја следеле 1,18 милијарди луѓе, битката за тоа кој бренд ќе го има своето лого на центарот на теренот ќе биде безмилосна.
