Австралија Опен 2026 ќе добие нова кралица. Минатогодишната шампионка Медисон Кис ја заврши одбраната на титулата во осминафиналето, откако беше поразена од својата сонародничка и блиска пријателка, Џесика Пегула, со убедливи 6-3, 6-4.
Пријателско дерби со висок влог
Иако Пегула и Кис се толку блиски што заедно водат подкаст („The Player’s Box“), на теренот немаше милост. Пегула, која е позната по својата неверојатна стабилност, одигра тактички совршен меч. Таа успеа да ја неутрализира моќната игра на Кис со варијации во сервисот и прецизни „дроп-шотови“ во клучните моменти.
„Морав да бидам паметна и да ризикувам на вториот сервис. Медисон ја враќа топката екстремно брзо, па менувањето на ритамот беше мојот единствен излез“, изјави Пегула по победата која ја однесе во нејзиното четвртфинале во Мелбурн.
Анисимова закажа „американско“ четвртфинале
Следна противничка на Пегула ќе биде уште една Американка, Аманда Анисимова. Светскиот рекет број 4 покажа дека е во страшна форма откако ја совлада Кинескињата Ванг Ксинју со 7-6, 6-4.
Натпреварот на Анисимова не помина без драма. Таа мораше да ги менува патиките среде мечот бидејќи ѓонот буквално и се распадна на теренот. „Ова е втора патика што ја кинам оваа недела, а никогаш претходно не ми се случило во животот“, се пошегува Анисимова, која по мечот и ја подари патиката на една среќна навивачка на трибините.
Со пласманот во четвртфиналето, Анисимова го комплетираше својот „грен слем сет“. Иако никогаш досега ја нема победено Пегула (0-3), Аманда верува дека ова е нејзиниот момент за трето последователно Грен слем финале.
