Најдобрата македонска тенисерка Лина Ѓорческа денеска го започнува својот настап на последниот Грен слем турнир за оваа година, престижниот УС Опен во Њујорк. Нашата тенисерка попладнево ќе истрча на теренот во рамките на првото коло од квалификациите, каде ќе се обиде да го повтори неодамнешниот успех од Вимблдон и да обезбеди пласман во главната ждрепка.
Предизвик од Јапонија
Противничка на Ѓорческа на стартот од квалификациите ќе биде Маи Хонтама од Јапонија. Станува збор за 26-годишна тенисерка која во моментов се наоѓа на 171. место на ВТА ранг-листата. Најдобриот пласман во својата кариера Јапонката го имаше забележано во 2024 година, кога стигна до 105. позиција во светот. Ова ветува изедначен и возбудлив дуел, но нашата претставничка има квалитет да стигне до позитивен резултат.
Според официјалната програма на организаторите во Њујорк, дуелот меѓу Ѓорческа и Хонтама е поставен како втор на теренот број 16. Програмата на овој терен започнува во 17:00 часот по македонско време, што значи дека Лина би требало да излезе на теренот веднаш по завршувањето на првиот меч од распоредот (најверојатно околу 18:30 до 19:00 часот).
Лето за историја и огромна самодоверба
Ѓорческа влегува во овие квалификации со огромна самодоверба и мотив, особено по блескавото лето кое зад себе го остави во Лондон. Да се потсетиме, таа испиша историја за македонскиот тенис на Вимблдон, каде ги мина сите три тешки квалификациски кола и за првпат во кариерата обезбеди пласман во главниот ждреб на најпрестижниот светски турнир. Целата македонска јавност се надева дека тој победнички менталитет ќе го пренесе и на американското тло.
