Во натпревар полн со пресврти и драма, Борнмут стигна до спектакуларна победа против Ливерпул со 3-2, благодарение на погодок во последните секунди од судиското продолжение. Ова е тежок удар за амбициите на тимот на Арне Слот, кој по серијата без пораз, сега се соочува со критики за бледото издание во првото полувреме.
„Црешите“ започнаа фуриозно. Еванилсон ја казни грешката на Ван Дајк во 26-тата минута за 1-0, а само седум минути подоцна, Алекс Хименез зголеми на 2-0, користејќи ја конфузијата во одбраната на „црвените“ по повредата на Џо Гомез.
OHHHHHH MYYYYY WORDDDDDDDDDDDDDDDDD
— AFC Bournemouth 🍒 (@afcbournemouth) January 24, 2026
Ливерпул се врати, но Адли го имаше последниот збор
Ливерпул успеа да се врати во мечот пред крајот на првиот дел преку капитенот Вирџил ван Дајк (45′), кој погоди со глава по корнер. Во второто полувреме, гостите притиснаа и израмнија во 80-тата минута со мајсторскиот слободен удар на Доминик Собослаи (2-2).
Кога се чинеше дека мечот ќе заврши без победник, Амин Адли стана херој за домаќините. Во 95-тата минута, по нафрлувањето на Џејмс Хил и мешаница во шеснаесетникот, Адли ја закова топката во мрежата за 3-2 и ерупција на трибините!
Слот под притисок, Ираола слави
Ова е прв пораз за Ливерпул по долгата серија, но и меч во кој се видоа старите болки во одбраната. Од друга страна, Андони Ираола може да биде горд на карактерот на својот тим, кој не се предаде и кога испушти предност од два гола.
