Вечерва во 20:00 часот, стадионот „Крал Абдула“ во Џеда ќе биде центарот на фудбалскиот свет. Реал Мадрид и Атлетико Мадрид се соочуваат во полуфиналето на шпанскиот Суперкуп, во натпревар кој ветува многу повеќе од обично локално дерби. Влогот е огромен – место во големото финале каде веќе чека Барселона, која синоќа го елиминираше Атлетик Билбао.
Ерата на Чаби Алонсо брка прв трофеј
Ова е прва шанса за Чаби Алонсо да го подигне својот прв пехар како тренер на „кралевите“. Реал влегува во овој меч во страшна форма, со четири последователни победи и дури 12 постигнати гола на последните натпревари.
„Мораме да бидеме ментално подготвени и да внимаваме на деталите. Знаеме колку е важен овој натпревар за нашите навивачи“, изјави Алонсо на официјалната прес-конференција. Првата ѕвезда на тимот, Џуд Белингем, исто така е подготвен за настап и ќе биде главниот мотор на „белите“ во потрагата по 14-тиот трофеј во ова натпреварување.
Традицијата на страна на Реал, но Симеоне секогаш има план
Ова ќе биде петти пат овие два тима да се сретнат во рамките на Суперкупот. Историјата е на страната на Реал (2 победи, 1 реми и 1 пораз), вклучувајќи го и епското полуфинале од сезоната 2023/24 кое заврши со неверојатни 5-3 по продолженија.
Од друга страна, Атлетико на Диего Симеоне, кој минатата сезона ја заврши како третопласиран во Ла Лига, доаѓа во Џеда со мотив да ги расипе плановите на својот најголем ривал. „Јорганџиите“ досега двапати го освојувале овој пехар и секогаш знаат како да го направат животот тежок за кралскиот клуб.
Победникот од вечерашната пресметка ќе се соочи со Барселона во недела, во првото големо „Ел Класико“ финале за оваа календарска година.
