Веста која денеска ја тресе фудбалската јавност, а која дефинитивно треба да ја земете со огромна доза на резерва, вели дека ни помалку ни повеќе, Пеп Гвардиола е главниот кандидат за нов селектор на Италија!
Конте, Манчини или… научна фантастика?
Според пишувањата на Gazzetta dello Sport, откако Паоло Малдини и Леонардо ги преземаат директорските функции за спас на уништениот италијански национален тим, тие бараат вистинска „револуција“. Клубовите од Серија А лобираат за Антонио Конте, нудејќи му 4 милиони евра по сезона и проект до Светското првенство во 2030 година.
Од друга страна, тука е и Роберто Манчини, кој има силни врски со претседателот на федерацијата, Џовани Малаго. Но, навивачите не забораваат лесно – за нив, Манчини е „предавникот“ кој избега во Саудиска Арабија за астрономски договор, оставајќи ја репрезентацијата на цедило.
Проектот „Гвардиола“ и магијата на Леонардо
Токму затоа, дуото Малдини-Леонардо не е воодушевено од старите имиња. Тие сакаат шок-терапија. И тука во приказната влегува Пеп Гвардиола. Иако звучи како чиста фудбалска утопија, не смееме да заборавиме дека токму Леонардо беше човекот кој го убеди Лионел Меси да потпише за ПСЖ за 35 милиони евра по сезона. Ако некој може да му продаде визија на Пеп, тоа е тој. Како резервни, уште полуди опции низ кулоарите се споменуваат и Карло Анчелоти (доколку добие отказ од Бразил) и Андреа Пирло.
Интернет заедницата плаче од смеа
Нормално, социјалните медиуми веднаш експлодираа од сарказам. Фановите не веруваат дека Италијанците би прифатиле странец. Еден корисник брутално прецизно ја сумираше италијанската фудбалска реалност:
„Ние го знаеме италијанскиот фудбал. Работата ќе му ја дадат на Конте на 18 месеци, па ќе го вратат Манчини, па Сари ќе се проба, па Алегри кој ќе си замине по еден месец за да се врати во Јувентус, и на крај Марчело Липи ќе ја добие работата.“
Останува да видиме дали ова е само уште една летна шпекулација или Италија навистина се подготвува за тектонско поместување. Дотогаш, спремете пуканки!
