По долга пауза од точно 1.003 дена, Манчестер Јунајтед конечно се враќа во елитното натпреварување. Тимот од „Олд Трафорд“ последен пат беше дел од Лигата на шампионите на 12 декември 2023 година, кога претрпе елиминација од Баерн Минхен. Овој четврток, четата на Мајкл Керик го започнува новиот европски поход на домашен терен против дебитантот Сабах од Азербејџан.
Шешко е подготвен, Шо одмора, Де Лихт рехабилитира
Добра вест за навивачите на Јунајтед е враќањето во форма на Бенџамин Шешко. Словенечкиот напаѓач, кој влезе од клупата и постигна гол викендов против Евертон, не беше во почетниот состав уште од 3 мај кога заработи повреда на потколеницата на мечот со Ливерпул.
„Бен е блиску до стартните единаесет. Пропушти многу, но сега тренира целосно и без ограничувања веќе повеќе од три недели. Тој заврши огромна работа за нас минатата сезона и убаво беше да се види како го постигнува оној гол против Евертон,“ изјави Керик на официјалната прес-конференција.
Што се однесува до дефанзивната линија, Лук Шо го пропушти средениот тренинг, но менаџерот смирува дека станува збор само за дополнителен ден за опоравување, а не за нова повреда. Единствениот сениор кој е дефинитивно надвор од комбинација е Матијс де Лихт, кој сè уште закрепнува од операцијата на грбот и за кого не се знае точниот датум за враќање на терените.
Респект за Сабах и високи амбиции
Противникот Сабах можеби е непознато име за пошироката јавност, но тимот доаѓа во Англија со голема самодоверба. Откако минатата сезона за првпат ја освоија домашната титула во Азербејџан, тие минаа дури четири квалификациски кола за да стигнат до главната фаза во ЛШ. Нивниот тренер, Валдас Дамбраускас, има и минато во академијата на Јунајтед каде работел пред околу две децении.
Керик потенцираше дека Сабах е одлично тренирана екипа со јасни принципи, која одлично ја контролира топката и врши силен тимски пресинг. Сепак, стратегот на Јунајтед, кој во 2008 година го подигна овој трофеј како играч, има јасна цел за својот тим во Европа.
„Ова е магично натпреварување. Кога сте надвор од него, сфаќате колку е посебно, а кога сте тука, сакате да го искористите максимумот. Ние сме пресреќни што се вративме, но не сме тука само за да уживаме во моментот. Тука сме за да завршиме работа и да стигнеме што е можно подалеку,“ дециден е Керик.
