Ноќта во НБА донесе спектакл на повеќе фронтови – од доминацијата на Минесота во Мајами, преку шоуто на Тајрис Макси во „Медисон“, до историска вечер на Џејлен Браун во Лос Анџелес.
Минесота ја прекина серијата на Хит
Тимбервулвс – Хит 125:115
Ентони Едвардс беше незапирлив со 33 поени, а Наз Рид уфрли 29 (20 во второто полувреме) во победата со која Минесота ја прекина победничката низа на Мајами. Волвс го решија натпреварот со брутална серија од 19:4 на стартот од последната четвртина. Џулиус Рендл додаде дабл-дабл (23 поени, 10 скока), додека Хит немаа одговор за интензитетот на гостите.
Макси диригираше во „Медисон“
76ерс – Никс 130:119
Тајрис Макси блесна со 36 поени, а Џоел Ембиид и ВЈ Еџкомб додадоа по 26 во сигурната победа на Филаделфија во Њујорк. Никс се потпираа на Џејлен Брансон (31), но третиот пораз по ред е реалност која сè повеќе боли.
Барет и Инграм го решија Торонто дербито
Рапторс – Хокс 134:117
РЏ Барет и Брендон Инграм уфрлија по 29 поени, а Торонто со разорна серија од 16:0 на стартот од последната четвртина го скрши отпорот на Атланта. Репторс остануваат речиси непобедливи кога водат по три четвртини.
Хорнетс ги изненадија Булс
Хорнетс – Булс 112:99
Мајлс Бриџис запиша 26 поени и 14 скока, а Шарлот ја прекина добрата серија на Чикаго. Вучевиќ се обиде да врати со 28 поени, но Хорнетс беа поконкретни кога беше најпотребно.
Авдија со трипл-дабл во Тексас
Трејл Блејзерс – Спарс 115:110
Дени Авдија имаше вечер за паметење: 29 поени, 11 скока и 10 асистенции. Портланд го контролираше речиси цел натпревар, а Сан Антонио немаше одговор за разноврсната игра на гостите.
Далас ја запре серијата на Хјустон
Маверикс – Рокетс 110:104
Ентони Дејвис (26 поени, 12 скока) и Макс Кристи (24) го однесоа Далас до прекин на лошата серија. Кевин Дурант уфрли 34 поени за Рокетс, но овојпат недоволно.
Кари се врати како што знае
Вориорс – Џез 123:114
Стеф Кари уфрли 31 поен со шест тројки и го предводеше Голден Стејт до победа над Јута. Лаури Марканен постигна 35, но Џез повторно заминаа со празни раце.
Браун со историска ноќ во ЛА
Селтикс – Клиперс 146:115
Џејлен Браун одигра натпревар на кариерата – 50 поени и апсолутна доминација. Бостон шутираше преку 55% од поле и го заврши западниот тур со стил, додека серијата на Клиперс заврши брутално.
