Крајот на една од највеличествените тениски кариери е чекор поблиску. Стен Вавринка, на возраст од 41 година и 106 дена, го одигра својот последен натпревар на Вимблдон, простувајќи се со перформанс кој долго ќе се памети.
Највозрасниот играч во машката ждрепка претрпе пораз во првото коло од Матео Беретини со резултат 6-7(7), 7-6(16), 7-6(7), 7-6(5). Оваа гладијаторска битка на Теренот број 1 траеше исцрпувачки 4 часа и 20 минути, во кои двајцата тенисери покажаа неверојатно ниво на борбеност. Ова беше 19-та вимблдонска кампања за Швајцарецот и дефинитивно негова последна.
Маратонски тај-брејк и бомби од сервиси
Спектаклот беше неизбежен, особено кога на спротивната страна се најде Беретини, кој стана првиот Италијанец што стигнал до финалето на Вимблдон во 2021 година, се потпираше на своите разорни сервиси кои достигнуваа брзина и до околу 223 км/ч. Од другата страна, Вавринка трпеливо ја чекаше својата шанса на втор сервис и ги казнуваше грешките на противникот.
Врвот на драмата се случи во вториот сет, кој беше решен по епски тај-брејк што заврши со 18-16 во корист на италијанскиот тенисер. Иако по два и пол сета се затвори покривот на стадионот и мечот влезе во доцна ноќна фаза, 41-годишниот Стен не покажуваше знаци на замор, играјќи како човек двојно помлад од него. Сепак, по четири одиграни тај-брејка, Беретини успеа да го скрши отпорот на ветеранот.
„Не сакам да се пензионирам, но знам дека е време да запрам“
По завршувањето на натпреварот, емоциите го совладаа големиот шампион. Со солзи во очите, Вавринка се обрати кон јавноста со зборови кои ги скршија срцата на тениските фанови:
„Вечерва повторно имавме одлична борба. Никогаш не е лесно да се каже збогум на нешто што толку многу го сакаш. Не сакам да се пензионирам, но знам дека е време за мене да запрам. Една од причините поради кои продолжив да играм толку долго е токму за да уживам во моменти како овој вечерва. Толку сум благодарен што ја имав оваа можност. Што добив вајлд-карта и шанса да играм уште еднаш на Вимблдон. Ова е толку специјален турнир. Како дете, секогаш сонував да бидам тука еден ден. Не можев да сонувам за подобро збогување“.
Наследството на Стен „The Man“
Иако тревата никогаш не беше неговата најомилена подлога (стигна само до две четвртфиналиња на Вимблдон во 2014 и 2015 година, а седум пати испаѓаше во првото коло), Вавринка остава зад себе колосално наследство. Во ерата на најголемите – Роџер Федерер, Рафаел Надал и Новак Ѓоковиќ, тој успеа да освои три Гранд Слем титули: Австралија Опен во 2014, Ролан Гарос во 2015 и УС Опен во 2016 година.
Тенискиот свет полека се подготвува за дефинитивното збогување со еден од најатрактивните играчи на својата генерација.
