Вчера српскиот ас го совлада својот сонародник Миомир Кецмановиќ, запишувајќи ново поглавје во историјата на тенисот. Со овој триумф, 38 годишниот Ѓоковиќ стана само третиот играч кој стигнал до бројката од 100 победи на Вимблдон, приклучувајќи им се на тениските легенди Мартина Навратилова и Роџер Федерер.
Ѓоковиќ има неверојатен биланс од 100 победи и само 12 порази на најпрестижниот Гренд Слем турнир на трева, каде што досега седум пати го освојуваше трофејот.
По две загубени финалиња од Карлос Алкарас во изминатите години, Ѓоковиќ сега ја продолжува својата мисија за осмата титула на Вимблдон. Следен предизвик за него ќе биде Австралиецот Алекс де Минаур, со кого ќе се соочи во четвртото коло.
Србинот ќе настапи по седми пат во низа во осминафиналето на Вимблдон, потврдувајќи дека и покрај годините, останува еден од главните фаворити за нова титула.
